വേനലവധിയുടെ നീണ്ട ഇടവേളയ്ക്ക് ശേഷം സംസ്ഥാനത്തെ വിദ്യാലയങ്ങൾ ഇന്ന് വീണ്ടും ഉണരുന്നു. വർണ്ണാഭമായ പ്രവേശനോത്സവത്തോടെയാണ് പുതിയ അധ്യയന വർഷത്തിന് തുടക്കം കുറിക്കുന്നത്. തിരുവനന്തപുരം പട്ടം ഗവൺമെന്റ് മോഡൽ ഗേൾസ് ഹയർസെക്കൻഡറി സ്കൂളിൽ നടക്കുന്ന ചടങ്ങിൽ മുഖ്യമന്ത്രി വി.ഡി. സതീശൻ സംസ്ഥാനതല പ്രവേശനോത്സവം ഉദ്ഘാടനം ചെയ്യും. വിദ്യാഭ്യാസ മന്ത്രി എൻ. ഷംസുദ്ദീൻ ചടങ്ങിൽ അധ്യക്ഷത വഹിക്കും. സ്കൂളുകളിൽ കുട്ടികളെ വരവേൽക്കാനായി വിപുലമായ ഒരുക്കങ്ങളാണ് അധ്യാപകരും നാട്ടുകാരും ചേർന്ന് പൂർത്തിയാക്കിയിരിക്കുന്നത്.
ഇത്തവണ ഏകദേശം 44 ലക്ഷത്തോളം വിദ്യാർത്ഥികളാണ് സംസ്ഥാനത്തെ സ്കൂളുകളിലേക്ക് അറിവ് തേടി എത്തുന്നത്. ഇതിൽ മൂന്ന് ലക്ഷത്തോളം കുരുന്നുകൾ തങ്ങളുടെ സ്കൂൾ ജീവിതത്തിന്റെ ആദ്യ ചുവടുവെപ്പായ ഒന്നാം ക്ലാസിലേക്ക് കടക്കുകയാണ്. സംസ്ഥാനതല ഉദ്ഘാടനത്തിന് പുറമേ എല്ലാ ജില്ലകളിലും സ്കൂൾ തലങ്ങളിലും വിപുലമായ പ്രവേശനോത്സവ പരിപാടികൾ സംഘടിപ്പിച്ചിട്ടുണ്ട്. ഇതോടൊപ്പം ഈ വർഷം മുതൽ സ്കൂൾ വേദികളിൽ വിദ്യാർത്ഥികൾ സൈബർ സുരക്ഷാ പ്രതിജ്ഞ കൂടി എടുക്കുമെന്ന് വിദ്യാഭ്യാസ മന്ത്രി അറിയിച്ചു.