ഇലക്ട്രിക് ഹാച്ച്ബാക്കായ ഡോൾഫിൻ സർഫ് അവതരിപ്പിച്ച് ബിവൈഡി

ബിവൈഡി പുതിയ ഇലക്ട്രിക് ഹാച്ച്ബാക്കായ ഡോൾഫിൻ സർഫ് അവതരിപ്പിച്ചു. ഈ കാറിന്‍റെ വില 22,990 യൂറോ മുതൽ 24,990 യൂറോ (22.4 ലക്ഷം മുതൽ 24.27 ലക്ഷം രൂപ വരെ) വരെയാണ്. യൂറോപ്പിൽ ബിവൈഡിയുടെ പത്താമത്തെ വാഹനമാണിത്.

ഇലക്ട്രിക് വാഹന (ഇവി) ഉപഭോക്താക്കൾക്ക് താങ്ങാനാവുന്ന വിലയിൽ ഒരു ഓപ്ഷൻ നൽകുക എന്നതാണ് ഇതിന്റെ ലക്ഷ്യം. ജൂൺ വരെ പ്രമോഷണൽ ഓഫർ കാരണം പ്രാരംഭ വില താൽക്കാലികമായി 19,990 യൂറോ (19.41 ലക്ഷം രൂപ) ആയി കുറച്ചു.

ഈ പുതിയ വാഹനം ഒരു അഞ്ച് ഡോർ ഹാച്ച്ബാക്കാണ്. ഇത് ബിവൈഡിയുടെ സീഗൾ മോഡലിന്റെ യൂറോപ്യൻ പതിപ്പാണ്. ഡബ്ലുഎൽടിപി മാനദണ്ഡങ്ങൾ അനുസരിച്ച്, ഡോൾഫിൻ സർഫിന് ഒറ്റ ചാർജിൽ 507 കിലോമീറ്റർ വരെ സഞ്ചരിക്കാൻ സാധിക്കും. ഇത് ഡിസി ഫാസ്റ്റ് ചാർജിംഗിനെ പിന്തുണയ്ക്കുന്നു, ഇത് 30 മിനിറ്റിനുള്ളിൽ ബാറ്ററി 10 ശതമാനം മുതൽ 80 ശതമാനം വരെ ചാർജ് ചെയ്യാൻ അനുവദിക്കുന്നു.

സുരക്ഷയുടെ കാര്യത്തിൽ, ബിവൈഡി ഡോൾഫിൻ സർഫിൽ ആറ് എയർബാഗുകൾ, ഇന്റലിജന്റ് ക്രൂയിസ് കൺട്രോൾ, ഓട്ടോമാറ്റിക് എമർജൻസി ബ്രേക്കിംഗ്, ലെയ്ൻ-ഡിപ്പാർച്ചർ അസിസ്റ്റ്, ഇന്റലിജന്റ് ഹൈ-ബീം കൺട്രോൾ തുടങ്ങിയവ സജ്ജീകരിച്ചിരിക്കുന്നു ബിവൈഡിയുടെ ഇ-പ്ലാറ്റ്‌ഫോം 3.0-ൽ നിർമ്മിച്ച ഒരു കോംപാക്റ്റ് ഹാച്ച്ബാക്കാണ് ഡോൾഫിൻ സർഫ്.