ബോണി കപൂറിന്റേയും അനില്‍ കപൂറിന്റേയും മാതാവ് നിര്‍മല്‍ കപൂര്‍ വിടവാങ്ങി

ബോളിവുഡ് താരമായ അനില്‍ കപൂറിന്റെയും നിര്‍മാതാവ് ബോണി കപൂറിന്റേയും നിര്‍മാതാവും നടനുമായ സഞ്ജയ് കപൂറിന്റേയും അമ്മ നിര്‍മല്‍ കപൂര്‍ (90) അന്തരിച്ചു. വെള്ളിയാഴ്ച വൈകീട്ട് 5.45-ഓടെ മുംബൈയില്‍ വെച്ചായിരുന്നു അന്ത്യം. വാര്‍ധക്യസഹജമായ അസുഖങ്ങളെത്തുടര്‍ന്ന് മുംബൈയിലെ കോകിലാബെന്‍ ധീരുഭായ് അംബാനി ആശുപത്രിയില്‍ ചികിത്സയിലായിരുന്നു. സംസ്‌കാരച്ചടങ്ങുകള്‍ ശനിയാഴ്ച പവന്‍ ഹന്‍സ് ശ്മശാനത്തില്‍ നടക്കും.

പ്രശസ്ത നിര്‍മ്മാതാവ് സുരീന്ദര്‍ കപൂറാണ് നിര്‍മല്‍ കപൂറിന്റെ ഭര്‍ത്താവ്. റീനാ കപൂര്‍, ബോണി കപൂര്‍, അനില്‍ കപൂര്‍, സഞ്ജയ് കപൂര്‍ എന്നിവരാണ് മക്കള്‍. അര്‍ജുന്‍ കപൂര്‍, സോനം കപൂര്‍, റിയ കപൂര്‍, ഹര്‍ഷ് വര്‍ധന്‍ കപൂര്‍, ജാന്‍വി കപൂര്‍, അന്‍ഷുല കപൂര്‍, ഖുഷി കപൂര്‍, ഷനായ കപൂര്‍, ജഹാന്‍ കപൂര്‍, മോഹിത് മര്‍വ തുടങ്ങിവയവരാണ് കൊച്ചുമക്കള്‍.