മറ്റേതൊരു താരമായിരുന്നാലും ഇപ്പോള്‍ ടീമില്‍ നിന്ന് പുറത്തായേനെ; ഐപിഎല്ലിൽ മാക്സ് വെല്ലിന്റെ മോശം കളിയിൽ വിമർശനവുമായി പൂജാര

ഇന്ത്യൻ പ്രീമിയർ ലീഗിൽ പഞ്ചാബ് കിങ്‌സ് താരം ഗ്ലെന്‍ മാക്സ് വെല്ലിന്റെ മോശം ഫോമിനെതിരെ വിമര്‍ശനവുമായി ചേതേശ്വര്‍ പൂജാര. മറ്റേതൊരു താരമായിരുന്നാലും ഇപ്പോള്‍ ടീമില്‍ നിന്ന് പുറത്തായേനെയെന്നും ലോക ക്രിക്കറ്റിൽ മാക്സ് വെല്ലിന്റെ പേര് കൊണ്ട് മാത്രമാണ് ഇപ്പോഴും ടീമിൽ നിർത്തുന്നതെന്നും പൂജാര പറഞ്ഞു.

‘ഇനിയെങ്കിലും മാക്സ്‌വെല്‍ ഉണര്‍ന്നു കളിച്ചില്ലെങ്കില്‍ പഞ്ചാബ് ടീം മാനേജ്മെന്‍റ് ക്ഷമകെട്ട് ആർസിബിയെ പോലെ ഓസീസ് താരത്തെ പുറത്തിരുത്താന്‍ സാധ്യതയുണ്ട്. മറ്റേതൊരു താരമായിരുന്നാലും ഇപ്പോള്‍ ടീമില്‍ നിന്ന് പുറത്തായേനെ. ലോക ക്രിക്കറ്റിൽ മാക്സ് വെല്ലിന്റെ പേര് കൊണ്ട് മാത്രമാണ് ഇപ്പോഴും ടീമിൽ നിർത്തുന്നത് ‘, പൂജാര പറഞ്ഞു.

ഐപിഎല്ലിൽ മാക്സ് വെൽ മോശം ഫോമിൽ തുടരുകയാണ്. ഈ സീസണിൽ 6.83 ശരാശരിയിൽ ആകെ 6 മത്സരത്തിൽ 41 റൺസാണ് താരം നേടിയത്. ബൗളിങ്ങിലും താരത്തിന് ഇതുവരെ തിളങ്ങാനായിട്ടില്ല. കഴിഞ്ഞ സീസണിൽ 14 മത്സരങ്ങളിൽ നിന്ന് 93 റൺസ് മാത്രമാണ് മാക്സ് വെൽ നേടിയത്. ബൗളിങ്ങിലും മോശം ഫോമായിരുന്ന താരത്തെ അന്നത്തെ ടീമായ റോയൽ ചലഞ്ചേഴ്‌സ് ബെംഗളൂരു മാറ്റിനിർത്തിയിരുന്നു. ഈ സീസണിൽ 4.2 കോടിക്കാണ് താരത്തെ പഞ്ചാബ് വാങ്ങിയത്.