എല്ലാത്തിനും പിഴവേണ്ട; 12 കുറ്റങ്ങളില്‍ മാത്രം ക്യാമറ വഴി പിഴ ചുമത്തിയാല്‍ മതി: ഉദ്യോഗസ്ഥരെ വിലക്കി ഗതാഗത കമ്മിഷണര്‍

തിരുവനന്തപുരം: കേന്ദ്ര മോട്ടോര്‍വാഹന നിയമം അനുശാസിക്കുന്ന 12 കുറ്റങ്ങളില്‍ മാത്രം ക്യാമറവഴി പിഴ ചുമത്തിയാല്‍ മതിയെന്ന് ഗതാഗതകമ്മിഷണര്‍. മൊബൈലില്‍ ചിത്രമെടുത്ത് ഇ-ചെലാന്‍വഴി മറ്റ് നിയമലംഘനങ്ങള്‍ക്കും ഉദ്യോഗസ്ഥര്‍ പിഴചുമത്തിയതോടെയാണ് കമ്മിഷണറുടെ ഇടപെടല്‍. വാഹനത്തിന് ഇന്‍ഷുറന്‍സ് പരിരക്ഷ ഇല്ലാതിരിക്കുക, രജിസ്ട്രേഷന്‍-ഫിറ്റ്നസ് കാലാവധി കഴിയുക, പുകപരിശോധന നടത്താതിരിക്കുക തുടങ്ങിയ കുറ്റങ്ങള്‍ക്ക് മൊബൈല്‍ഫോണില്‍ എടുക്കുന്ന ചിത്രം അടിസ്ഥാനമാക്കി പിഴചുമത്തരുതെന്നാണ് നിര്‍ദേശം. വാഹനങ്ങള്‍ നിര്‍ത്തി പരിശോധിക്കുന്നവേളയില്‍ ഇവയ്ക്ക് പ്രത്യേകം ചെക്ക് റിപ്പോര്‍ട്ട് നല്‍കി പിഴയീടാക്കാം.

ഹെല്‍മെറ്റ് ഇല്ലാതെ വാഹനം ഓടിക്കുന്നവരുടെ ചിത്രമെടുക്കുമ്പോള്‍ വാഹനത്തിന്റെ രേഖകള്‍ക്കൂടി ഓണ്‍ലൈനില്‍ പരിശോധിച്ച് മറ്റ് കുറ്റങ്ങള്‍ക്കും ഉദ്യോഗസ്ഥര്‍ പിഴചുമത്തിയതാണ് പരാതിക്ക് ഇടയാക്കിയത്. ടൂറിസ്റ്റ് വാഹനങ്ങളുടെ മുകളില്‍ ഘടിപ്പിക്കുന്ന ലഗേജ് കാരിയറുകള്‍ക്ക് പിഴയീടാക്കരുതെന്നും നിര്‍ദേശിച്ചിട്ടുണ്ട്. എന്നാല്‍, ഓഡിറ്റ് പരാമര്‍ശത്തെത്തുടര്‍ന്നാണ് ഒന്നിലധികം കുറ്റങ്ങള്‍ക്ക് പിഴചുമത്തേണ്ടിവന്നതെന്ന് ഉദ്യോഗസ്ഥര്‍ പറയുന്നു. പിഴചുമത്തുമ്പോള്‍ ആ വാഹനത്തിന് മറ്റ് ഗതാഗതനിയമലംഘനങ്ങളില്ലെന്ന് ഉദ്യോഗസ്ഥര്‍ ഉറപ്പാക്കണമെന്ന് ഓഡിറ്റ് നിര്‍ദേശമുണ്ടായിരുന്നു.

പിഴ ചുമത്താവുന്ന കുറ്റങ്ങള്‍

1. അമിതവേഗം
2. ഹെല്‍മെറ്റ് ഉപയോഗിക്കാതിരിക്കുക
3. അനധികൃത പാര്‍ക്കിങ്
4. ചുവപ്പ് സിഗ്നല്‍ ലംഘിക്കുക
5. വാഹനത്തിന് പുറത്തേക്ക് തള്ളിനില്‍ക്കുന്നവിധം ഭാരം കയറ്റുക
6. സീറ്റ് ബെല്‍റ്റ് ഉപയോഗിക്കാതിരിക്കുക
7. ലെയ്ന്‍ ട്രാഫിക് ലംഘനം
8. ചരക്കുവാഹനങ്ങളില്‍ യാത്രക്കാരെ കൊണ്ടുപോകുക
9. നമ്പര്‍ പ്ലേറ്റില്‍ ക്രമക്കേട്
10. മൊബൈല്‍ഫോണ്‍ ഉപയോഗം

11 മഞ്ഞവരയുള്‍പ്പെടെയുള്ള റോഡിലെ മാര്‍ക്കിങ്ങുകള്‍ ലംഘിക്കുക

12. സിഗ്നല്‍ ലംഘനം