ഉത്സവം കണ്ട് മടങ്ങുകയായിരുന്ന യുവാക്കളെ കൊലപ്പെടുത്താൻ ശ്രമിച്ചു; ഒളിവിൽപോയ പ്രതികൾ അറസ്റ്റിൽ

കായംകുളം: ഉത്സവം കണ്ട് മടങ്ങുകയായിരുന്ന യുവാക്കളെ കൊലപ്പെടുത്താൻ ശ്രമിച്ച പ്രതികൾ അറസ്റ്റിൽ. ചെന്നിത്തല സ്വദേശികളായ ജുബിൻ ജോൺസൺ (24), സ്റ്റാൻലി (23) എന്നിവരാണ് അറസ്റ്റിലായത്. എരുവ ശ്രീകൃഷ്ണസ്വാമി ക്ഷേത്രത്തിലെ ഉത്സവം കണ്ട് മടങ്ങുകയായിരുന്ന പത്തിയൂർ സ്വദേശികളായ സുജിത്, ബിനു എന്നിവരെയാണ് കൊലപ്പെടുത്താൻ ശ്രമിച്ചത്. അന്നേ ദിവസം തന്നെ എരുവ അമ്പലത്തിൻറെ തെക്കേ നടയിൽ നിന്ന എരുവ സ്വദേശി വിജയനെ കൊലപ്പെടുത്താനും ശ്രമിച്ചിരുന്നു.

കാക്കനാട് ജംഗ്ഷന് സമീപം വെച്ചാണ് പ്രതികൾ സുജിത്തിനെയും ബിനുവിനെയും വെട്ടി കൊലപ്പെടുത്താൻ ശ്രമിച്ചത്. ഇതിന് പിന്നാലെ പ്രതികൾ ഒളിവിൽ പോയി. ഒളിവിൽ പോയ പ്രതികളെ മാന്നാറിൽ നിന്നാണ് കായംകുളം പൊലീസ് പിടികൂടിയത്.

വിജയനെ ആക്രമിച്ച് കൊലപ്പെടുത്താൻ ശ്രമിച്ച കേസിലെ ഒന്നു മുതൽ നാല് വരെ പ്രതികളെ പൊലീസ് നേരത്തേ അറസ്റ്റ് ചെയ്തിരുന്നു. കായംകുളം ഡിവൈഎസ്‌പി ബാബുക്കുട്ടൻറെ മേൽനോട്ടത്തിൽ സിഐ അരുൺ ഷാ, എസ്ഐ രതീഷ് ബാബു, പ്രൊബേഷൻ എസ്ഐ ആനന്ദ്, എഎസ്ഐ റെജി, പൊലീസുദ്യോഗസ്ഥരായ അരുൺ, ഗോപകുമാർ, പ്രദീപ്, ശ്രീനാഥ് എന്നിവരടങ്ങിയ സംഘമാണ് പ്രതികളെ പിടികൂടിയത്.