കൊച്ചി: ഇന്ത്യയുടെ ഡിജിറ്റല് പേഴ്സണല് ഡാറ്റ പ്രൊട്ടക്ഷന് (ഡിപിഡിപി) നിയമങ്ങള് പ്രകാരം പാലിക്കല് സമയപരിധി വെട്ടിച്ചുരുക്കാനുള്ള നീക്കം വലിയ കോര്പ്പറേഷനുകളെ അപകടത്തിലാക്കുമെന്നും സ്റ്റാര്ട്ടപ്പുകളെയും ചെറുകിട ബിസിനസുകളെയും കടുത്ത സമ്മര്ദ്ദത്തിലാക്കുമെന്നും ഇന്ത്യയിലെ ആദ്യത്തെ സ്വതന്ത്ര കോര്പ്പറേറ്റ് ഗവേണന്സ് ഗവേഷണ ഉപദേശക സ്ഥാപനമായ ഇന്ഗവേണ് റിസര്ച്ച് സര്വീസസ് സംഘടിപ്പിച്ച മാധ്യമ സമ്മേളനത്തില് വിദഗ്ധര് മുന്നറിയിപ്പ് നല്കി.
ഡിപിഡിപി ചട്ടക്കൂടിന് പിറകിലെ ഉദ്ദേശ്യത്തെ സ്വാഗതം ചെയ്യുമ്പോള് തന്നെ ആദ്യം അറിയിച്ച പ്രകാരമുള്ള 18 മാസത്തിന് പകരം 12 മാസത്തില് അത് നടപ്പാക്കുന്നത് വേഗത്തിലാക്കുന്നതും ചില കേസുകളില് ഉടനടി നടപ്പിലാക്കുന്നതും ഇന്ത്യയിലെ സ്റ്റാര്ട്ടപ്പ് ആവാസവ്യവസ്ഥയുടെ ഈ നിര്ണായക നിമിഷത്തില് ആനുപാതികമല്ലാത്ത ചെലവുകള്ക്ക് കാരണമാകുമെന്നും, നിയന്ത്രണ അനിശ്ചിതത്വം സൃഷ്ടിക്കാനും, നിക്ഷേപകരുടെ ആത്മവിശ്വാസം കുറയ്ക്കാനും ഇടയാക്കുമെന്നും ഈ സന്ദര്ഭത്തില് സംസാരിച്ചവര് മുന്നറിയിപ്പ് നല്കി.
‘ഇന്ത്യയ്ക്ക് ശക്തമായ ഡാറ്റാ സംരക്ഷണം ആവശ്യമാണ്, എന്നാല് കമ്പനികളെ ബോധപൂര്വമല്ലാതെ ശിക്ഷിക്കുന്ന രീതിയില് രൂപകല്പ്പന ചെയ്യാന് പാടില്ല,’ ഇന്ഗവേണ് റിസര്ച്ച് സര്വീസസിന്റെ സ്ഥാപകന് ശ്രീറാം സുബ്രഹ്മണ്യന് പറഞ്ഞു.
ഡിപിഡിപി നിയമങ്ങള്ക്ക് കീഴിലുള്ള അതിവേഗ ബാധ്യതകളുടെ യഥാര്ത്ഥ ആഘാതം പരിശോധിക്കുന്നതിനായി നയം, നിയമം, നിക്ഷേപം എന്നീ മേഖലകളിലെ വിദഗ്ദ്ധരുടെ കാഴ്ചപ്പാടുകളെ മാധ്യമ സമ്മേളനം ഒരുമിച്ച് കൊണ്ടുവന്നു. അനുസരണം എന്നത് ഒരു കടലാസ്പണിയല്ല എന്നും, മറിച്ച് സാങ്കേതിക ഘടന, ഭരണ സംവിധാനങ്ങള്, സ്ഥാപനങ്ങളുടെ പ്രക്രിയകള് എന്നിവയില് ആഴത്തിലുള്ള മാറ്റങ്ങള് ആവശ്യമായ ഒന്നാണെന്ന് സംസാരിച്ചവര് ഊന്നിപ്പറഞ്ഞു.
ഡിപിഡിപി നിയമങ്ങളെക്കുറിച്ചുള്ള അവബോധവും പ്രവര്ത്തനപരമായ ധാരണയും ഇതുവരെ ചെറിയ കമ്പനികള്, പ്രാരംഭ ഘട്ട സ്റ്റാര്ട്ടപ്പുകള്, എംഎസ്എംഇകള് എന്നിവയിലേക്ക് പൂര്ണ്ണമായി വ്യാപിച്ചിട്ടില്ലെന്നും പങ്കെടുത്തവര് അഭിപ്രായപ്പെട്ടു.
ഏറ്റവും കടുത്ത പ്രത്യാഘാതം നേരിടുക സ്റ്റാര്ട്ടപ്പുകള്ക്കാണ്. അധിക സംഭരണ ശേഷിയോ, പാലന ടീമുകളോ, പ്രോസസ്സര് കരാറുകള് വേഗത്തില് പുനഃക്രമീകരിക്കാനുള്ള കഴിവോ കമ്പനികള്ക്ക് ഇല്ലെന്ന് പങ്കെടുത്തവര് അഭിപ്രായപ്പെട്ടു. ആവാസവ്യവസ്ഥയിലുടനീളം ഒരു സ്വകാര്യതാ സംസ്കാരം കെട്ടിപ്പടുക്കുന്നതില് ഇന്ത്യ ഇപ്പോഴും പ്രാരംഭ ഘട്ടത്തിലാണെന്നും നിയമം സങ്കീര്ണ്ണവും പ്രക്രിയകളിലും സംവിധാനങ്ങളിലും ഉത്തരവാദിത്ത ചട്ടക്കൂടുകളിലും കാര്യമായ മാറ്റങ്ങള് ആവശ്യപ്പെടുന്നതുമായതിനാല് സര്ക്കാര് ഏജന്സികള്ക്കും പൊതു സ്ഥാപനങ്ങള്ക്കും പോലും ഈ ബാധ്യതകള് നടപ്പിലാക്കാന് സമയം ആവശ്യമായി വരുമെന്നും പങ്കെടുത്തവര് അഭിപ്രായപ്പെട്ടു.