ഡൽഹി: ബാങ്ക് ജീവനക്കാരുടെ മൂന്ന് ദിവസത്തെ പണിമുടക്ക് പ്രഖ്യാപനത്തിന്റെ പശ്ചാത്തലത്തിൽ വരാനിരിക്കുന്ന ഞായറാഴ്ച (സെപ്റ്റംബർ 27) ബാങ്കുകൾ തുറന്ന് പ്രവർത്തിക്കും. റിസർവ് ബാങ്കാണ് ഇതിന് അനുമതി നൽകിയത്. സെപ്റ്റംബർ 28 മുതൽ 30 വരെയുള്ള ദിവസങ്ങളിലാണ് ബാങ്ക് ജീവനക്കാരുടെ സംഘടനയായ യുണൈറ്റഡ് ഫോറം ഓഫ് ബാങ്ക് യൂണിയൻസ് പണിമുടക്കിന് ആഹ്വാനം ചെയ്തിരിക്കുന്നത്.
നാലാം ശനിയാഴ്ചയും ഞായറാഴ്ചയും പണിമുടക്ക് ദിനങ്ങളും ചേരുമ്പോൾ ബാങ്കുകൾ തുടർച്ചയായി അഞ്ച് ദിവസം അടഞ്ഞുകിടക്കുന്നത് ഒഴിവാക്കാനാണ് കേന്ദ്രസർക്കാരും റിസർവ് ബാങ്കും ഞായറാഴ്ച പ്രവൃത്തിദിനമാക്കാൻ തീരുമാനിച്ചത്. ബാങ്കുകളുടെ അർധവാർഷിക കണക്കെടുപ്പും ട്രഷറി പ്രവർത്തനങ്ങളും നടക്കുന്ന സെപ്റ്റംബർ 30-ലെ പണിമുടക്ക് വിപണിയെ ബാധിച്ചേക്കുമെന്ന ആശങ്ക നിലനിൽക്കുന്നുണ്ട്.
പണിമുടക്ക് സമയത്ത് നേരിട്ടുള്ള സേവനങ്ങൾ തടസ്സപ്പെടുമെങ്കിലും എ.ടി.എം, യു.പി.ഐ, മൊബൈൽ ബാങ്കിംഗ് തുടങ്ങിയ ഡിജിറ്റൽ സംവിധാനങ്ങൾ ലഭ്യമായിരിക്കും. എ.ടി.എമ്മുകളിൽ പണം ഉറപ്പാക്കാൻ ക്രമീകരണങ്ങൾ ചെയ്തിട്ടുണ്ടെന്നും ഇടപാടുകൾ മുൻകൂട്ടി പൂർത്തിയാക്കാൻ ശ്രദ്ധിക്കണമെന്നും എസ്.ബി.ഐ., ബാങ്ക് ഓഫ് ബറോഡ ഉൾപ്പെടെയുള്ള ബാങ്കുകൾ അറിയിച്ചു.