സൽമാൻ ഒരു ഗുണ്ട, അയാളുടെ കുടുംബം മുഴുവൻ പ്രതികാര ബുദ്ധിയുള്ളവരെന്ന് സംവിധായകൻ അഭിനവ് കശ്യപ്

ബോളിവുഡിലെ ഭായിജാൻ എന്നാണ് സൽമാൻ ഖാനെ പലപ്പോഴും വിശേഷിപ്പിക്കുന്നത്. ആരാധകർ ഏറെ പ്രതീക്ഷയോടെ കാത്തിരിക്കുന്ന തന്റെ ചിത്രമായ ‘ബാറ്റിൽ ഓഫ് ഗാൽവാൻ’ എന്ന ചിത്രത്തിന്റെ ഷൂട്ടിംഗിലാണ് താരം. വാർത്തകളിൽ മിക്കപ്പോഴും ഇടം നേടാറുള്ള സൽമാൻ, ദബാംഗ് സിനിമയുടെ സംവിധായകൻ അഭിനവ് സിംഗ് കശ്യപിന്റെ പുതിയ ആരോപണങ്ങൾ കാരണം വീണ്ടും ശ്രദ്ധാകേന്ദ്രമായിരിക്കുന്നു. സൽമാൻ ഖാന്റെ കുടുംബത്തെ പ്രതികാരബുദ്ധിയുള്ളവർ എന്നാണ് സംവിധായകൻ വിശേഷിപ്പിച്ചത്.

കൂടാതെ സൽമാൻ ഒരു ഗുണ്ടയാണെന്നും അഭിനവ് കശ്യപ് ആരോപിച്ചു. സൽമാന് അഭിനയത്തിൽ താൽപ്പര്യമില്ലെന്നും കഴിഞ്ഞ 25 വർഷമായി അദ്ദേഹം അഭിനയത്തിലില്ലെന്നും അഭിനവ് കൂട്ടിച്ചേർത്തു. ‘സൽമാന് അഭിനയത്തിൽ പോലും താൽപ്പര്യമില്ല, കഴിഞ്ഞ 25 വർഷമായി അദ്ദേഹം അതിൽ ഉൾപ്പെട്ടിട്ടില്ല. ജോലിക്ക് വരുന്നത് തന്നെ ഉപകാരം ചെയ്യുന്നത് പോലെ. ഒരു സെലിബ്രിറ്റിയാകാൻ അദ്ദേഹത്തിന് കൂടുതൽ താൽപ്പര്യമുണ്ട്, പക്ഷേ അഭിനയത്തിൽ താൽപ്പര്യമില്ല. അയാൾ ഒരു ഗുണ്ട ആണ്. ദബാങ്ങിന് മുമ്പ് എനിക്ക് ഇതിനെക്കുറിച്ച് അറിയില്ലായിരുന്നു. സൽമാൻ മോശം പെരുമാറ്റമുള്ള വ്യക്തിയാണ്’ -അദ്ദേഹം പറഞ്ഞു.

50 വർഷമായി സിനിമ മേഖലയിൽ പ്രവർത്തിക്കുന്ന ഒരു സിനിമ കുടുംബത്തിൽ നിന്നുള്ളയാളാണ് സൽമാനെന്ന് അഭിനവ് പറഞ്ഞു. അദ്ദേഹം ആ പ്രക്രിയ തുടരുന്നു. അവർ പ്രതികാരബുദ്ധിയുള്ള ആളുകളാണ്. അവർ മുഴുവൻ പ്രക്രിയയും നിയന്ത്രിക്കുന്നു. നിങ്ങൾ അവരോട് യോജിക്കുന്നില്ലെങ്കിൽ, അവർ നിങ്ങളെ തകർക്കുമെന്നും അദ്ദേഹം കൂട്ടിച്ചേർത്തു.

അതേസമയം, എ.ആർ. മുരുഗദോസിന്റെ ആക്ഷൻ ഡ്രാമയായ സിക്കന്ദറിലാണ് സൽമാൻ അവസാനമായി അഭിനയിച്ചത്. സൽമാനോടൊപ്പം, രശ്മിക മന്ദാന, സത്യരാജ്, ഷര്‍മാന്‍ ജോഷി, പ്രതീക് ബബ്ബർ, കാജൽ അഗർവാൾ എന്നിവരടങ്ങിയ വലിയ താരനിരയാണ് സിക്കന്ദറിൽ അണിനിരന്നത്. സൽമാൻ ഖാനോടൊപ്പം പ്രവർത്തിക്കുന്നത് എളുപ്പമായിരുന്നില്ല എന്ന് മുരുഗദോസും പറഞ്ഞിരുന്നു.

സൽമാൻ രാത്രി എട്ടിനാണ് സെറ്റിൽ എത്തുന്നത്. അതിനാൽ പകൽ ചിത്രീകരിക്കേണ്ട രംഗങ്ങൾ പോലും രാത്രിയിൽ ഷൂട്ട് ചെയ്യേണ്ടി വരും. അതിരാവിലെ മുതൽ ഷൂട്ട് ചെയ്യുന്ന ശീലമുണ്ട്. എന്നാൽ, അവിടെ അങ്ങനെ അല്ലായിരുന്നു കാര്യങ്ങൾ. ഇത് സെറ്റിലെ മറ്റ് അഭിനേതാക്കളേയും ബാധിച്ചിരുന്നു എന്നും അദ്ദേഹം പറഞ്ഞിരുന്നു.

ഇത്രയും ഗുരുതരമായ ആരോപണങ്ങൾ ഉയർന്നിട്ടും, അഭിനവ് കശ്യപിന്റെ അവകാശവാദങ്ങളോട് സൽമാൻ ഖാൻ ഒരിക്കലും പരസ്യമായി പ്രതികരിച്ചിട്ടില്ല. ഇപ്പോൾ തന്റെ അടുത്ത വലിയ പ്രോജക്റ്റായ ബാറ്റിൽ ഓഫ് ഗാൽവാൻ എന്ന സിനിമയുടെ ചിത്രീകരണത്തിലാണ് സൽമാൻ.

2020 ജൂൺ 15 ന് ഗാൽവാൻ താഴ്‌വരയിൽ ഇന്ത്യയും ചൈനീസ് സൈനികരും തമ്മിൽ ഏറ്റുമുട്ടിയ യഥാർത്ഥ സംഭവങ്ങളെ ആസ്പദമാക്കിയാണ് അപൂർവ ലഖിയ ഈ ചിത്രം സംവിധാനം ചെയ്യുന്നത്. സൽമാൻ ഖാനുമൊപ്പം ചിത്രാംഗദ സിംഗ് പ്രധാന വേഷത്തിൽ എത്തുന്നു, എന്നാൽ നിർമ്മാതാക്കൾ ഇതുവരെ ഔദ്യോഗിക റിലീസ് തീയതി പ്രഖ്യാപിച്ചിട്ടില്ല.