ഈ വർഷം ജനുവരിയിൽ സർവ്വകാല റെക്കോർഡിലെത്തിയ സ്വർണവിലയിൽ നിലവിൽ 23 ശതമാനത്തിലധികം വലിയ ഇടിവാണ് രേഖപ്പെടുത്തിയിരിക്കുന്നത്. വരാനിരിക്കുന്ന ദീപാവലിയും തുടർന്നുള്ള വിവാഹ സീസണും പ്രമാണിച്ച് സ്വർണം വാങ്ങാൻ കാത്തിരിക്കുന്നവർക്ക് നിലവിലെ വിപണി സാഹചര്യം ഏറെ നിർണായകമാണെന്നാണ് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നത്.
അന്താരാഷ്ട്ര വിപണിയിൽ 2026 ജനുവരിയിൽ ഔൺസിന് 5,419 (ചില വിപണി കണക്കുകൾ പ്രകാരം 5,595) എന്ന എക്കാലത്തെയും ഉയർന്ന നിരക്കിലെത്തിയ സ്വർണം ഒക്ടോബർ ആദ്യവാരത്തോടെ 4,155 നിലവാരത്തിലേക്ക് കൂപ്പുകുത്തി. റെക്കോർഡ് നിരക്കിൽ നിന്ന് കണക്കാക്കിയാൽ ഏകദേശം 26 ശതമാനത്തോളം ഇടിവാണ് ആഗോള വിപണിയിലുണ്ടായത്. മൾട്ടി കമ്മോഡിറ്റി എക്സ്ചേഞ്ചിൽ 10 ഗ്രാം സ്വർണത്തിന് 2,47,917 വരെ ഉയർന്ന നിരക്ക് നിലവിൽ 1,49,270 എന്ന ശരാശരി നിലവാരത്തിലേക്ക് താഴ്ന്നു. ഓഗസ്റ്റ് അവസാന വാരം 10 ഗ്രാമിന് 1,64,773 ആയിരുന്ന നിരക്ക് തൊട്ടുപിന്നാലെയുള്ള ആഴ്ചകളിൽ 1,45,991 വരെ താഴേക്ക് പതിച്ചിരുന്നു.
സ്വർണവില 10 ഗ്രാമിന് 1.50 ലക്ഷത്തിന് താഴെയെത്തിയത് ഉപഭോക്താക്കൾക്ക് ആകർഷകമായി തോന്നാമെങ്കിലും, ഒറ്റയടിക്ക് വൻതുകയ്ക്ക് സ്വർണം വാങ്ങിക്കൂട്ടരുതെന്നാണ് വിദഗ്ദ്ധർ മുന്നറിയിപ്പ് നൽകുന്നത്. വരാനിരിക്കുന്ന ഉത്സവ സീസൺ കാരണം പ്രാദേശികമായി ഡിമാൻഡ് ഉയരുമെങ്കിലും ആഗോളതലത്തിൽ സ്വർണവില ക്രമപ്പെടുന്ന പ്രവണതയാണുള്ളത്. അതിനാൽ തന്നെ മുൻവർഷങ്ങളേക്കാൾ വ്യാപാരികൾ ജാഗ്രത പുലർത്തുന്നുണ്ട്. കൂടാതെ ഉപഭോക്താക്കൾ ഭാരം കുറഞ്ഞതും, മോഡേൺ ഡിസൈനുകളുള്ളതുമായ ലൈറ്റ്‌വെയ്റ്റ് ആഭരണങ്ങളിലേക്ക് കൂടുതൽ ശ്രദ്ധ കേന്ദ്രീകരിക്കുന്നതായും വിപണി റിപ്പോർട്ടുകൾ വ്യക്തമാക്കുന്നു.