സിപിഐഎം വിപുലീകൃത സംസ്ഥാന കമ്മിറ്റിയിൽ നടന്നത് തിരുത്തൽ പ്രക്രിയയ്ക്ക് ഉതകുന്ന ആരോഗ്യകരമായ ചർച്ചകളാണെന്ന് സംസ്ഥാന സെക്രട്ടറി എം.വി. ഗോവിന്ദൻ വ്യക്തമാക്കി. വിമർശനങ്ങളും സ്വയംവിമർശനങ്ങളും പാർട്ടിയുടെ സ്വാഭാവിക ശൈലിയാണെന്നും, അത് എന്തോ അത്ഭുതമെന്ന മട്ടിൽ മാധ്യമങ്ങൾ പ്രചരിപ്പിക്കുന്നത് ശരിയല്ലെന്നും അദ്ദേഹം പറഞ്ഞു. മതനിരപേക്ഷ ഉള്ളടക്കത്തോടെയുള്ള ജനാധിപത്യ കേരളം രൂപീകരിക്കുകയാണ് ലക്ഷ്യം.
കേന്ദ്ര നയങ്ങൾക്കും സംസ്ഥാന സർക്കാരിന്റെ സമീപനങ്ങൾക്കുമെതിരായ പ്രതിരോധവും കേന്ദ്ര ഏജൻസികളുടെ ഇടപെടലുകൾക്കെതിരായ ദേശീയതല പൊതുവേദിയും ചർച്ചയായി. ജനങ്ങളുമായുള്ള ബന്ധം കുറഞ്ഞുവെന്ന് റിപ്പോർട്ടിൽ വ്യക്തമാക്കുന്നുണ്ടെന്നും, അനധികൃത സ്വത്തുസമ്പാദനത്തിൽ പാർട്ടി കർശനമായി ഇടപെടുമെന്നും എം.വി. ഗോവിന്ദൻ അറിയിച്ചു.
എല്ലാ ആഘോഷങ്ങളും ജനവിഭാഗങ്ങളുടേതാക്കണമെന്നും വിശ്വാസികളെ ഒഴിവാക്കി വർഗീയതയെ നേരിടാനാകില്ലെന്നും പ്രതിനിധികൾ അഭിപ്രായപ്പെട്ടു. പാർട്ടി വിദ്യാഭ്യാസത്തിന് പ്രത്യേക ആപ്പുകൾ, ഗവേഷണ കേന്ദ്രങ്ങളുടെ പുനരുദ്ധാരണം, നവമാധ്യമ ഇടപെടൽ എന്നിവയും ചർച്ച ചെയ്തു. ചർച്ചാ അവസരം നിഷേധിച്ചെന്ന ആരോപണം തള്ളിയ അദ്ദേഹം, മുൻകൂട്ടി ചർച്ച ചെയ്ത് തയ്യാറാക്കിയ രേഖയിൽ 19 അംഗങ്ങൾ ഇതിനകം പങ്കെടുത്തുവെന്നും വിശദീകരിച്ചു.
തനിക്കടക്കമുള്ള എല്ലാ നേതാക്കൾക്കെതിരെയും സംസ്ഥാന കമ്മിറ്റിയിൽ വിമർശനമുയർന്നതായി അദ്ദേഹം വെളിപ്പെടുത്തി. സെഷൻ അവസാനിക്കുമ്പോൾ രേഖ തിരിച്ചുവാങ്ങുന്നത് പാർട്ടിയുടെ സാധാരണ രീതി മാത്രമാണെന്നും അംഗങ്ങൾക്ക് ചർച്ചയിൽ പങ്കെടുക്കാൻ ആവശ്യത്തിന് അവസരമുണ്ടെന്നും ഗോവിന്ദൻ കൂട്ടിച്ചേർത്തു.