തിരുവനന്തപുരം: പ്രിയദർശിനി പദ്ധതിക്കായി സ്വകാര്യബസുകൾ വാടകയ്ക്കെടുക്കുമെന്ന് മന്ത്രി സി.പി. ജോൺ. ഇതുസംബന്ധിച്ച വിദഗ്ധസമിതിയുടെ ശുപാർശ സ്വാഗതാർഹമാണെന്നും വാടക നിരക്ക് സംബന്ധിച്ച് സ്വകാര്യബസുടമകളുമായി ചർച്ചയ്ക്ക് തയ്യാറാണെന്നും മന്ത്രി പറഞ്ഞു. പ്രിയദർശിനി പദ്ധതി മൂലം സ്വകാര്യബസ് മേഖലയിലുണ്ടായ പ്രതിസന്ധി പഠിക്കാൻ സർക്കാർ നിയോഗിച്ച സമിതി റിപ്പോർട്ട് സമർപ്പിച്ചതിന് പിന്നാലെയാണ് മന്ത്രിയുടെ പ്രതികരണം.
ദീർഘദൂര പാതകളിൽ സ്വകാര്യ ആഡംബര ബസുകൾ വാടകയ്ക്കെടുത്ത് സർവീസ് നടത്തുന്നുണ്ട്. ഇതേ മാതൃകയിൽ ഹ്രസ്വദൂര പാതകളിലേക്കും സ്വകാര്യബസുകൾ വാടകയ്ക്കെടുക്കുന്നത് പരിഗണിക്കും. കിലോമീറ്റർ അടിസ്ഥാനത്തിലായിരിക്കും വാടക നിശ്ചയിക്കുക. രണ്ട് കെ.എസ്.ആർ.ടി.സി. ബസുകൾക്ക് ഒന്ന് എന്ന അനുപാതത്തിൽ വാടകബസുകൾ ഓടിക്കാനാണ് നിർദേശമെന്ന് സമിതി ചെയർമാനും മുൻ ഡി.ജി.പി.യുമായ കെ. പദ്മകുമാർ പറഞ്ഞു. പൊതുഗതാഗത മേഖലയ്ക്കായി സമഗ്രമായ ഗതാഗതനയം രൂപവത്കരിക്കണമെന്നും സമിതി ശുപാർശ ചെയ്തിട്ടുണ്ട്.
സംസ്ഥാനത്ത് 12,000 സ്വകാര്യ ബസുകളാണുള്ളത്. പ്രിയദർശിനി പദ്ധതിയുടെ പശ്ചാത്തലത്തിൽ സ്വകാര്യബസുകൾ സർവീസ് നിർത്തിയിട്ടില്ലെന്നും മന്ത്രി പറഞ്ഞു. അതേസമയം, ചില മേഖലകളിൽ സ്വകാര്യബസുകൾ പ്രതിസന്ധി നേരിടുന്നുണ്ട്. സമിതിയുടെ മറ്റ് ശുപാർശകൾ പരിശോധിച്ച് ചർച്ച ചെയ്തശേഷം തീരുമാനമെടുക്കുമെന്നും മന്ത്രി വ്യക്തമാക്കി.
സ്വകാര്യബസുകളുമായി മത്സരിച്ചോടുന്ന മേഖലകളിൽ പ്രിയദർശിനി ഷെഡ്യൂളുകൾ പുനഃക്രമീകരിക്കണമെന്നാണ് സമിതിയുടെ മറ്റൊരു നിർദേശം. റൂട്ട് പുനഃക്രമീകരണത്തിന് ഡെപ്യൂട്ടി ട്രാൻസ്പോർട്ട് കമ്മിഷണർമാരെ ചുമതലപ്പെടുത്തണമെന്നും ശുപാർശയുണ്ട്. എം.എസ്.എം.ഇ. പരിഗണന നൽകി സ്വകാര്യബസ് സർവീസുകളെ വ്യവസായമായി പ്രഖ്യാപിക്കണം. ഇതിലൂടെ ബാങ്ക് വായ്പയ്ക്കും മറ്റ് സാമ്പത്തിക സഹായങ്ങൾക്കും സാധ്യതയൊരുങ്ങും.
റോഡ് നികുതി മാസംതോറും അടയ്ക്കാനുള്ള സംവിധാനം ഏർപ്പെടുത്തണമെന്നും സമിതി ശുപാർശ ചെയ്തു. നിലവിൽ ത്രൈമാസ അടിസ്ഥാനത്തിലാണ് നികുതി അടയ്ക്കുന്നത്. പ്രതിമാസ നികുതി സംവിധാനം സാമ്പത്തികഭാരം കുറയ്ക്കാൻ സഹായിക്കുമെന്നാണ് വിലയിരുത്തൽ.
ബസുകളുടെ കാലാവധി 25 വർഷമായി ഉയർത്തണമെന്നും ശുപാർശയുണ്ട്. നിലവിൽ 22 വർഷമാണ് കാലാവധി. ഇത് ഏകദേശം 1,500 സ്വകാര്യബസുകൾക്ക് സഹായകരമാകും.
കെ.എസ്.ആർ.ടി.സി. പമ്പുകളിൽനിന്ന് സ്വകാര്യബസുകൾക്കും ഡീസൽ നൽകണം. വിപണിവിലയേക്കാൾ കുറഞ്ഞ നിരക്കിൽ ഇന്ധനം ലഭ്യമാക്കാൻ ഇതിലൂടെ കഴിയുമെന്നാണ് സമിതിയുടെ വിലയിരുത്തൽ.
അവധിദിവസങ്ങളിൽ പ്രത്യേക സർവീസ് നടത്തുന്നതിനുള്ള പെർമിറ്റ് നടപടികൾ ലഘൂകരിക്കണം. ഇതിനുള്ള നടപടികൾ ഓൺലൈനാക്കണമെന്നും സമിതി നിർദേശിച്ചു.
ബസുകളിൽ പരസ്യം പതിക്കുന്നതിന് പ്രതിവർഷ ഫീസ് ഏർപ്പെടുത്തി കൂടുതൽ പരസ്യങ്ങൾക്ക് അനുമതി നൽകണം. പരസ്യം മാറ്റുന്നതിനനുസരിച്ച് പ്രത്യേക അനുമതി വാങ്ങേണ്ട സാഹചര്യം ഒഴിവാക്കണമെന്നും ശുപാർശയുണ്ട്.
സ്വകാര്യബസുകൾക്ക് സംസ്ഥാന ഇൻഷുറൻസ് പരിരക്ഷ നൽകണമെന്നും സമിതി നിർദേശിച്ചു. സ്വകാര്യ ഇൻഷുറൻസ് മേഖലയെക്കാൾ കുറഞ്ഞ പ്രീമിയത്തിൽ പരിരക്ഷ ലഭ്യമാക്കണമെന്നാണ് ശുപാർശ.
ക്ഷേമനിധി അടയ്ക്കേണ്ട തൊഴിലാളികളുടെ എണ്ണം രണ്ടായി നിജപ്പെടുത്തണമെന്നും സമിതി നിർദേശിച്ചിട്ടുണ്ട്. നിലവിൽ മൂന്ന് ജീവനക്കാർക്കാണ് ക്ഷേമനിധി അടയ്ക്കുന്നത്.