ഭാരത് എൻസിഎപി ക്രാഷ് ടെസ്റ്റുകളിൽ റെനോ ഡസ്റ്റർ മികച്ച നേട്ടം കൈവരിച്ചു. മുതിർന്നവരുടെയും കുട്ടികളുടെയും സുരക്ഷയിൽ 5-സ്റ്റാർ റേറ്റിംഗ് സ്വന്തമാക്കിയാണ് പുതിയ ഡസ്റ്റർ വിപണിയിൽ കരുത്തറിയിക്കുന്നത്. എവല്യൂഷൻ, ടെക്നോ, ഐക്കണിക് എന്നീ മൂന്ന് വകഭേദങ്ങളിലും പരീക്ഷണം നടത്തിയെങ്കിലും, ഈ 5-സ്റ്റാർ റേറ്റിംഗ് ഡസ്റ്ററിന്റെ എല്ലാ വകഭേദങ്ങൾക്കും ബാധകമാണെന്ന് അധികൃതർ വ്യക്തമാക്കി.
മുതിർന്നവരുടെ സുരക്ഷ.
മുതിർന്നവരുടെ സുരക്ഷാ പരിശോധനയിൽ ആകെയുള്ള 32 പോയിന്റുകളിൽ 30.49 പോയിന്റുകളും ഡസ്റ്റർ നേടി. മണിക്കൂറിൽ 64 കിലോമീറ്റർ വേഗതയിൽ നടത്തിയ ഫ്രണ്ടൽ ഇംപാക്ട് ടെസ്റ്റിൽ ഡ്രൈവറുടെ തല, കഴുത്ത്, തുടകൾ എന്നിവയ്ക്ക് മികച്ച സംരക്ഷണം ലഭിച്ചു. സൈഡ് പോൾ ഇംപാക്ട് ടെസ്റ്റിലും എസ്യുവി മികച്ച പ്രകടനം കാഴ്ചവച്ചു. എങ്കിലും ഡ്രൈവറുടെ നെഞ്ച്, പാദങ്ങൾ എന്നിവയ്ക്കുള്ള സംരക്ഷണം ‘പര്യാപ്തം’ എന്ന നിലയിലാണ് രേഖപ്പെടുത്തിയിരിക്കുന്നത്.
കുട്ടികളുടെ സുരക്ഷ.
കുട്ടികളുടെ സുരക്ഷയിൽ 49-ൽ 45 പോയിന്റുകൾ നേടിയാണ് ഡസ്റ്റർ തിളങ്ങിയത്. 18 മാസം പ്രായമുള്ള കുട്ടിയുടെയും മൂന്ന് വയസുള്ള കുട്ടിയുടെയും ഡമ്മികൾ ഉപയോഗിച്ചായിരുന്നു പരിശോധന. ഐസോഫിക്സ് (ISOFIX) ആങ്കറേജുകളുടെയും സപ്പോർട്ട് ലെഗിന്റെയും സഹായത്തോടെ തലയ്ക്ക് പരിക്കേൽക്കാനുള്ള സാധ്യത ഒഴിവാക്കാനും സൈഡ് ഇംപാക്ട് ഘട്ടങ്ങളിൽ പൂർണ്ണ സംരക്ഷണം ഉറപ്പാക്കാനും ഡസ്റ്ററിന് സാധിച്ചു.
സുരക്ഷാ സവിശേഷതകൾ.
എല്ലാ വകഭേദങ്ങളിലും ആറ് എയർബാഗുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ട്രാക്ഷൻ കൺട്രോൾ, ടയർ പ്രഷർ മോണിറ്ററിംഗ് സിസ്റ്റം എന്നിവ റെനോ നൽകുന്നുണ്ട്. ഉയർന്ന വകഭേദങ്ങളിൽ ലെവൽ 2 ADAS, 360-ഡിഗ്രി ക്യാമറ, ബ്ലൈൻഡ് സ്പോട്ട് വാണിംഗ് തുടങ്ങിയ ആധുനിക സംവിധാനങ്ങളും ലഭ്യമാണ്. കൂടാതെ ഹിൽ ഹോൾഡ് അസിസ്റ്റ്, എല്ലാ ചക്രങ്ങളിലും ഡിസ്ക് ബ്രേക്കുകൾ എന്നിവയും ഡസ്റ്ററിന്റെ സുരക്ഷ വർദ്ധിപ്പിക്കുന്നു.