ലോക്കോ പൈലറ്റിന് ദേഹാസ്വാസ്ഥ്യം; സമയോചിത ഇടപെടൽ മൂലം ഒഴിവായത് വൻ ദുരന്തം  

കണ്ണൂർ: ഓടിക്കൊണ്ടിരുന്ന തീവണ്ടിയുടെ ലോക്കോ പൈലറ്റിന് തലകറക്കം അനുഭവപ്പെട്ടതിനെത്തുടർന്ന് വണ്ടി സുരക്ഷിതമായി നിർത്തി. ഇന്നലെ വൈകീട്ട് ചെന്നൈ-മംഗളൂരു എഗ്മോർ എക്സ്പ്രസിലെ കെ.പി. പ്രജേഷിനാണ് (51) എടക്കാട് എത്താറായപ്പോൾ ദേഹാസ്വാസ്ഥ്യം ഉണ്ടായത്. ലോക്കോ പൈലറ്റിന്റെ സമയോചിതമായ ഇടപെടൽ വലിയൊരു അപകടം ഒഴിവാക്കി.

അസുഖം തോന്നിയ ഉടൻതന്നെ പ്രജേഷ് എടക്കാട് സ്റ്റേഷൻ മാസ്റ്ററെ വിവരം അറിയിച്ചു. എടക്കാട് സ്റ്റോപ്പില്ലാത്തതിനാൽ തീവണ്ടി അടിയന്തരമായി നിർത്തി, പ്രജേഷിനെ ചാലയിലെ ഒരു സ്വകാര്യ ആശുപത്രിയിലേക്ക് മാറ്റി. അസിസ്റ്റന്റ് ലോക്കോ പൈലറ്റ് ഒപ്പമുണ്ടായിരുന്നെങ്കിലും, ചട്ടം അനുസരിച്ച് വണ്ടി ഓടിക്കാൻ അനുവാദമില്ലാത്തതിനാൽ പകരം ലോക്കോ പൈലറ്റ് എത്തേണ്ടി വന്നു. കോഴിക്കോട് ഡിപ്പോയിലെ ഉദ്യോഗസ്ഥനായ പ്രജേഷിന്റെ ഡ്യൂട്ടി കോഴിക്കോട് മുതൽ മംഗളൂരു വരെയായിരുന്നു.

തുടർന്ന് കണ്ണൂരിൽ നിന്ന് എത്തിയ ലോക്കോ പൈലറ്റ് ഭട്ടിലാൽ മീണയാണ് തീവണ്ടി യാത്ര തുടർന്നത്. സംഭവത്തെത്തുടർന്ന് തീവണ്ടി ഏകദേശം അരമണിക്കൂറോളം വൈകിയാണ് മംഗളൂരുവിലേക്ക് പുറപ്പെട്ടത്.