മോദിയുടെ മണിപ്പൂർ സന്ദർശിച്ചതിന് പിന്നാലെ ചുരാചന്ദ്പൂർ ജില്ലയിൽ വീണ്ടും സംഘർഷം

ചുരാചന്ദ്പൂർ: പ്രധാനമന്ത്രി നരേന്ദ്ര മോദി മണിപ്പൂർ സന്ദർശിച്ചതിന് തൊട്ടുപിന്നാലെ ചുരാചന്ദ്പൂർ ജില്ലയിൽ വീണ്ടും സംഘർഷം. സംഘർഷത്തിൽ കുക്കി നേതാവായ കാൽവിൻ ഐഖെന്താങ്ങിന്റെ വീട് കഴിഞ്ഞ ദിവസം രാത്രി ജനക്കൂട്ടം തീയിട്ടു. ഈ സംഭവം മേഖലയിലെ സമാധാന ശ്രമങ്ങൾക്ക് വലിയ തിരിച്ചടിയായിരിക്കുകയാണ്.

ദേശീയപാത 2 (NH-2) തുറന്നുകൊടുക്കുന്നതുമായി ബന്ധപ്പെട്ട് കുക്കി സംഘടനകളും സർക്കാരും തമ്മിൽ ആശയക്കുഴപ്പം നിലനിൽക്കുന്നുണ്ട്. റോഡ് തുറന്നു എന്ന് കേന്ദ്രം പ്രഖ്യാപിച്ചതിന് പിന്നാലെ, തങ്ങൾ ഹൈവേ പൂർണ്ണമായി തുറന്നിട്ടില്ലെന്ന് കുക്കി സോ കൗൺസിൽ (KZC) വ്യക്തമാക്കി. കാങ്‌പോക്പി ജില്ലയിലെ ആളുകളോട് സുരക്ഷാ സേനയുമായി സഹകരിക്കാൻ മാത്രമാണ് തങ്ങൾ ആവശ്യപ്പെട്ടതെന്നും, മറ്റ് പ്രദേശങ്ങളിൽ നിന്നുള്ളവർക്ക് പ്രവേശനം അനുവദിച്ചിട്ടില്ലെന്നും KZC അറിയിച്ചു.

മെയ്‌തെയ്, കുക്കി സമൂഹങ്ങൾ തമ്മിലുള്ള സംഘർഷത്തിന് ഇതുവരെ ഒരു പരിഹാരമായിട്ടില്ല. അതിനാൽ, ഇരു വിഭാഗത്തിൽ നിന്നുമുള്ള ആരും എതിർ വിഭാഗത്തിന്റെ പ്രദേശങ്ങളിലേക്ക് പോകരുതെന്നും, അത്തരം നീക്കങ്ങൾ ഗുരുതരമായ പ്രത്യാഘാതങ്ങൾക്ക് വഴിവയ്ക്കുമെന്നും KZC മുന്നറിയിപ്പ് നൽകി. കുക്കി നാഷണൽ ഓർഗനൈസേഷൻ (KNO) അടക്കമുള്ള സംഘടനകൾ കേന്ദ്രവുമായി സമാധാന കരാറിൽ ഒപ്പിട്ടിരുന്നു. മണിപ്പൂരിന്റെ പ്രാദേശിക സമഗ്രത നിലനിർത്താനും, മേഖലയിൽ സമാധാനം കൊണ്ടുവരാനും ലക്ഷ്യമിട്ടാണ് ഈ കരാർ. എന്നാൽ ഈ ആക്രമണങ്ങളും തർക്കങ്ങളും സമാധാന ശ്രമങ്ങൾക്ക് വലിയ വെല്ലുവിളിയാകുന്നു.