പ്രിയദർശന്റെ വിരമിക്കൽ മരണ വാർത്തയായി തെറ്റിദ്ധരിച്ചു; എയറിലായി മിക സിംഗ്, ട്രോളി സോഷ്യൽ മീഡിയ

പ്രമുഖ ബോളിവുഡ് ഗായകനായ ‘മിക്ക സിംഗ്’ ഇപ്പോൾ സോഷ്യൽ മീഡിയയിൽ ചിരിക്ക് വകനൽകുന്ന ഒരു അവസ്ഥയിലാണ്. പ്രശസ്ത ചലച്ചിത്ര സംവിധായകൻ പ്രിയദർശൻ ബോളിവുഡിൽ നിന്ന് വിരമിക്കുന്നു എന്ന വാർത്ത മരണവാർത്തയായി തെറ്റിദ്ധരിച്ചതാണ് മിക്കയെ ട്രോളുകളിൽ എത്തിച്ചത്. ഒരു വാർത്താ പോർട്ടലിന്റെ പോസ്റ്റിന് താഴെ “ഓം ശാന്തി” എന്ന് കമന്റ് ചെയ്തതോടെ നെറ്റിസൺസ് അദ്ദേഹത്തെ രസകരമായി കളിയാക്കാൻ തുടങ്ങി.

“ഹേരാ ഫേരി 3, അവസാന പ്രോജക്റ്റ്! പ്രിയദർശൻ ബോളിവുഡിനോട് വിട പറഞ്ഞേക്കാം” എന്ന തലക്കെട്ടോടെയുള്ള ഒരു വാർത്താ പോസ്റ്റാണ് മിക്ക സിംഗിനെ ആശയക്കുഴപ്പത്തിലാക്കിയത്. “വിട പറഞ്ഞേക്കാം” എന്ന വാചകം പ്രിയദർശന്റെ മരണവാർത്തയായി തെറ്റിദ്ധരിച്ച അദ്ദേഹം ഉടൻ തന്നെ “ഓം ശാന്തി” എന്ന് കമന്റ് ചെയ്തു. ഇന്ത്യയിൽ ഒരാളുടെ വിയോഗത്തിൽ ദുഃഖം പ്രകടിപ്പിക്കാൻ ഉപയോഗിക്കുന്ന ഒരു വാക്കാണിത്. മിക്കയുടെ ഈ കമന്റ് കണ്ടതോടെ സോഷ്യൽ മീഡിയ ഉപയോക്താക്കൾ ട്രോളുകളുമായി രംഗത്തെത്തി.

“സസ്താ നശേ ഐസാ കർവാ ദേ ഹേ, മത് കിയ കരോ പാജി” (ഇത്തരം വിലകുറഞ്ഞ ലഹരി ഉപയോഗിക്കരുത് പാജി) എന്ന് ഒരാൾ കുറിച്ചു.

“പാജി പാക്ക് സെക്ക് ടു നൈ മാർ ലിയ നാ തുസ്സി ചസ്മ ഉതാരോ” (പാജി വീണ്ടും സ്റ്റോക്ക് എടുത്തില്ലെന്ന് കരുതുന്നു, കണ്ണട ഊരിക്കളയൂ) എന്ന് മറ്റൊരു കമന്റ്.

“പാജി അഭി ശാം ഹുവാ ഹേ… ആജ് ഇത്നാ ജൽദി പാജി” (പാജി ഇപ്പോഴേ വൈകുന്നേരമായിട്ടുള്ളൂ, ഇന്ന് ഇത്ര നേരത്തെയാണോ) എന്ന് മൂന്നാമതൊരാൾ പരിഹസിച്ചു.

ഇത് ആദ്യമായല്ല മിക്ക സിംഗ് വിവാദത്തിൽ അകപ്പെടുന്നത്. അടുത്തിടെ പാകിസ്ഥാൻ നടി ഹനിയ ആമിറിനെ നായികയാക്കി ദിൽജിത് ദോസഞ്ജ് അഭിനയിച്ച സർദാർ ജി 3 എന്ന സിനിമ റിലീസ് ചെയ്തപ്പോൾ അതിനെതിരെ മിക്ക രംഗത്തെത്തിയിരുന്നു. “ദേശ് പെഹ്‌ലെ” (രാജ്യമാണ് ആദ്യം) എന്ന തലക്കെട്ടോടെ ഇൻസ്റ്റാഗ്രാം സ്റ്റോറി പങ്കുവെച്ച അദ്ദേഹം, ഇന്ത്യയും പാകിസ്ഥാനും തമ്മിലുള്ള മോശം ബന്ധം നിലനിൽക്കുമ്പോൾ ചിലർ നിരുത്തരവാദിത്തപരമായി പെരുമാറുന്നുവെന്ന് വിമർശിച്ചു.

ദിൽജിത് ദോസഞ്ജിന്റെ പേര് നേരിട്ട് പരാമർശിച്ചില്ലെങ്കിലും, പാകിസ്ഥാൻ നടിയെ ഉൾപ്പെടുത്തി സിനിമ ചെയ്തതിനെയും ‘വ്യാജ ഗായകൻ’ എന്ന് വിളിച്ചും മിക്ക ദിൽജിത്തിനെ പരിഹസിച്ചു.