പുതിയ ഫീച്ചറുകൾ; വരുന്നു മാരുതി സുസുക്കി ഗ്രാൻഡ് വിറ്റാര

മാരുതി സുസുക്കി തങ്ങളുടെ ജനപ്രിയ എസ്‌യുവിയായ ഗ്രാൻഡ് വിറ്റാരയുടെ 2025 പതിപ്പ് വിപണിയിൽ അവതരിപ്പിച്ചു. പുതുക്കിയ മാരുതി സുസുക്കി ഗ്രാൻഡ് വിറ്റാരയിൽ മെച്ചപ്പെട്ട സുരക്ഷാ സവിശേഷതകളുള്ള പുതിയ വകഭേദങ്ങളും പുതിയ ഫീച്ചറുകളും ലഭിക്കും. ഇന്ത്യൻ വിപണിയിൽ ഇതിന്റെ എക്സ്-ഷോറൂം വില 11.42 ലക്ഷം രൂപയിൽ ആരംഭിക്കുന്നു.

പുതുക്കിയ പതിപ്പിൽ ഉപഭോക്താക്കൾക്ക് ഇപ്പോൾ സ്റ്റാൻഡേർഡായി 6-എയർബാഗ് സുരക്ഷ ലഭിക്കും. ഇതിനുപുറമെ, വയർലെസ് കണക്റ്റിവിറ്റിയുള്ള 22.86 സെന്റിമീറ്റർ സ്മാർട്ട്പ്ലേ പ്രോ ഇൻഫോടെയ്ൻമെന്റ് സിസ്റ്റം, ഹെഡ് അപ്പ് ഡിസ്പ്ലേ, 360-ഡിഗ്രി ക്യാമറ, വയർലെസ് ചാർജിംഗ് ഡോക്ക്, വെന്റിലേറ്റഡ് സീറ്റുകൾ, സുസുക്കി കണക്റ്റ് സാങ്കേതികവിദ്യ, പനോരമിക് സൺറൂഫ് എന്നിവ പുതിയ ഗ്രാൻഡ് വിറ്റാരയിൽ ചേർത്തിട്ടുണ്ട്.

മാരുതി സുസുക്കി ഗ്രാൻഡ് വിറ്റാരയുടെ സ്ട്രോംഗ് ഹൈബ്രിഡ് പതിപ്പിൽ കമ്പനി ഒരു പുതിയ ഡെൽറ്റ വേരിയന്റും അവതരിപ്പിച്ചു. ഇതിന് 16.99 ലക്ഷം രൂപയാണ് എക്‌സ്-ഷോറൂം വില. പുതുക്കിയ മാരുതി സുസുക്കി ഗ്രാൻഡ് വിറ്റാര ഹൈബ്രിഡ് പതിപ്പിന് പെട്രോൾ എഞ്ചിനുമായും ലിഥിയം അയൺ ബാറ്ററിയിൽ പ്രവർത്തിക്കുന്ന ഒരു ഇലക്ട്രിക് മോട്ടോറുമായും ബന്ധിപ്പിച്ചിരിക്കുന്ന ഇരട്ട പവർട്രെയിനും ലഭിക്കും.

മാരുതി സുസുക്കിയിൽ എപ്പോഴും ഉപഭോക്താക്കളെ ശ്രദ്ധിക്കുകയും ഉപഭോക്തൃ ആവശ്യത്തിനനുസരിച്ച് തങ്ങളുടെ ഉൽപ്പന്ന നിര പതിവായി പുതുക്കുകയും ചെയ്യുന്നു എന്ന് പുതിയ 2025 ഗ്രാൻഡ് വിറ്റാരയുടെ അവതരണത്തെക്കുറിച്ച് മാരുതി സുസുക്കി ഇന്ത്യ ലിമിറ്റഡിന്റെ മാർക്കറ്റിംഗ് ആൻഡ് സെയിൽസ് സീനിയർ എക്സിക്യൂട്ടീവ് ഓഫീസർ പാർത്തോ ബാനർജി പറഞ്ഞു.