ഡിജിസിഎയുടെ കർശന നടപടി: എയർ ഇന്ത്യയ്ക്ക് താക്കീത്

ന്യൂഡൽഹി: ഫ്ലൈറ്റ് ക്രൂ ഷെഡ്യൂളിങ്ങിലെയും റോസ്റ്ററിങ്ങിലെയും ക്രമക്കേടുകളെ തുടർന്ന് എയർ ഇന്ത്യയിലെ മൂന്ന് ഉന്നത ഉദ്യോഗസ്ഥരെ പുറത്താക്കാൻ സിവിൽ ഏവിയേഷൻ റെഗുലേറ്റർ (DGCA) ഉത്തരവിട്ടു. ഡിവിഷണൽ വൈസ് പ്രസിഡന്റ് ഉൾപ്പെടെയുള്ള ഈ ഉദ്യോഗസ്ഥർക്കെതിരെ അച്ചടക്ക നടപടി എടുക്കാനും ഡിജിസിഎ ടാറ്റ ഗ്രൂപ്പിന്റെ ഉടമസ്ഥതയിലുള്ള എയർ ഇന്ത്യയോട് ആവശ്യപ്പെട്ടു. ഇത് സമീപകാലത്ത് ഒരു പൂർണ്ണ സർവീസ് ഷെഡ്യൂൾഡ് എയർലൈനിനെതിരെ ഡിജിസിഎ സ്വീകരിക്കുന്ന ഏറ്റവും കർശനമായ നടപടികളിലൊന്നാണ്.

എയർ ഇന്ത്യയുടെ ഇന്റഗ്രേറ്റഡ് ഓപ്പറേഷൻസ് കൺട്രോൾ സെന്ററിൽ (IOCC) നടത്തിയ ഓഡിറ്റിലാണ് ക്രമക്കേടുകൾ കണ്ടെത്തിയത്. വിമാനജീവനക്കാരുടെ വിന്യാസം, ഫ്ലൈറ്റ് ഡിസ്പാച്ച്, കാലാവസ്ഥാ നിരീക്ഷണം, റൂട്ട് പ്ലാനിംഗ് എന്നിവയെല്ലാം കൈകാര്യം ചെയ്യുന്നത് IOCC ആണ്. DGCA പുറപ്പെടുവിച്ച കാരണം കാണിക്കൽ നോട്ടീസ് പ്രകാരം, മെയ് 16, മെയ് 17 തീയതികളിൽ ബെംഗളൂരുവിൽ നിന്ന് ലണ്ടൻ ഹീത്രോയിലേക്ക് സർവീസ് നടത്തിയ AI133 എന്ന എയർ ഇന്ത്യ വിമാനങ്ങൾ പത്ത് മണിക്കൂറെന്ന പരമാവധി ഫ്ലൈറ്റ് ഡ്യൂട്ടി സമയ പരിധി ലംഘിച്ചു.

ഈ വിമാനങ്ങളുടെ പ്രവർത്തനം സിവിൽ ഏവിയേഷൻ റിക്വയർമെന്റ് (CAR), സെക്ഷൻ 7, സീരീസ് J, പാർട്ട് III, ലക്കം III ലെ ഖണ്ഡിക 6.1.3 (2019 ഏപ്രിൽ 24) ലംഘിച്ചതായി ഡിജിസിഎ ചൂണ്ടിക്കാട്ടി. ഈ വിമാനങ്ങൾ സാധാരണ ദീർഘദൂര സർവീസുകളായിരുന്നെന്നും അടിയന്തര സാഹചര്യത്തിലുള്ളവയല്ലായിരുന്നെന്നും DGCA വ്യക്തമാക്കി. എയർ ഇന്ത്യയുടെ അക്കൗണ്ടബിൾ മാനേജർക്ക് DGCA കാരണം കാണിക്കൽ നോട്ടീസ് നൽകിയിട്ടുണ്ട്. നോട്ടീസ് ലഭിച്ച് ഏഴ് ദിവസത്തിനുള്ളിൽ വിശദീകരണം നൽകിയില്ലെങ്കിൽ, എയർലൈനിന്റെ പ്രവർത്തന അനുമതി നഷ്ടപ്പെടുന്നത് ഉൾപ്പെടെയുള്ള കടുത്ത നടപടികൾ നേരിടേണ്ടി വരുമെന്ന് റെഗുലേറ്റർ മുന്നറിയിപ്പ് നൽകി.

DGCA യുടെ നിരീക്ഷണങ്ങളുടെ ഗൗരവം എയർ ഇന്ത്യ അംഗീകരിച്ചു. “റെഗുലേറ്ററുടെ നിർദ്ദേശം ഞങ്ങൾ അംഗീകരിക്കുകയും ഉത്തരവ് നടപ്പിലാക്കുകയും ചെയ്തിട്ടുണ്ട്. കമ്പനിയുടെ ചീഫ് ഓപ്പറേഷൻസ് ഓഫീസർ IOCC-ക്ക് നേരിട്ടുള്ള മേൽനോട്ടം വഹിക്കും. സുരക്ഷാ പ്രോട്ടോക്കോളുകളും സ്റ്റാൻഡേർഡ് രീതികളും പൂർണ്ണമായി പാലിക്കുന്നുണ്ടെന്ന് ഉറപ്പാക്കാൻ എയർ ഇന്ത്യ പ്രതിജ്ഞാബദ്ധമാണ്,” എയർ ഇന്ത്യ പ്രസ്താവനയിൽ അറിയിച്ചു.