ഔദ്യോഗികമായി ഇന്ത്യൻ വിപണിയിൽ പ്രവേശിച്ച് ടെസ്‌ല; ഇന്ത്യയിലെ മോഡൽ വൈ ഇവികളുടെ വില പട്ടിക പുറത്തിറക്കി

മുംബൈയിൽ ആദ്യത്തെ ഷോറൂം ആരംഭിച്ചുകൊണ്ട് ഔദ്യോഗികമായി ഇന്ത്യൻ വിപണിയിലും ടെസ്‌ല പ്രവേശിച്ചിരിക്കുകയാണ്. ഇലക്ട്രിക് വാഹന (ഇവി) നിർമ്മാതാക്കളായ ടെസ്‌ല ചൊവ്വാഴ്ച മുംബൈയിലെ ബാന്ദ്ര കുർള കോംപ്ലക്സിലെ (ബികെസി) മേക്കർ മാസിറ്റി മാളിലാണ് തങ്ങളുടെ പുതിയ ഷോറൂം ആരംഭിച്ചത്. ലോകത്തിലെ ഏറ്റവും വേഗത്തിൽ വളരുന്ന ഇലക്ട്രിക് വാഹന വിപണികളിൽ ഒന്നിലേക്ക് ആദ്യ ഔപചാരിക ചുവടുവയ്പ്പ് നടത്തുന്ന ഇലോൺ മസ്‌കിന്റെ കമ്പനിക്ക് ഇതൊരു വലിയ ചുവടുവയ്പ്പാണ്. മോഡൽ വൈ എസ്‌യുവിയിലൂടെയായിരിക്കും കമ്പനി ഇന്ത്യയിലേക്കുള്ള യാത്ര ആരംഭിക്കുന്നതെന്ന് ടെസ്‌ലയുടെ വെബ്‌സൈറ്റ് പറയുന്നു.

മോഡൽ Y റിയർ-വീൽ ഡ്രൈവിന് 60 ലക്ഷം രൂപ (ഏകദേശം $69,765) ആണ് വില എന്നാണ് റിപ്പോർട്ടുകൾ. ലോംഗ് റേഞ്ച് റിയർ-വീൽ ഡ്രൈവ് വേരിയന്റിന് 68 ലക്ഷം രൂപ വിലയുണ്ട്. മറ്റ് വിപണികളിലെ ടെസ്‌ലയുടെ അടിസ്ഥാന വിലയേക്കാൾ കൂടുതലാണ് ഈ വിലകൾ. അമേരിക്കയിൽ , മോഡൽ Y യുടെ വില $44,990 ൽ ആണ് ആരംഭിക്കുന്നത്, അതേസമയം ചൈനയിൽ 263,500 യുവാൻ ഉം ജർമ്മനിയിൽ 45,970 യൂറോയുമാണ്. ഇന്ത്യയിൽ ഉയർന്ന വിലയ്ക്ക് കാരണം പ്രധാനമായും ഇറക്കുമതി തീരുവകളാണ് എന്നാണ് ലഭിക്കുന്ന സൂചന. അതേസമയം വിപണി പ്രതികരണത്തെ ആശ്രയിച്ച്, ടെസ്‌ല ഇന്ത്യയിലുടനീളം തുറക്കാൻ സാധ്യതയുള്ള നിരവധി സ്ഥലങ്ങളിൽ ആദ്യത്തേതായിരിക്കും മുംബൈയിലെ ഷോറൂം എന്ന് പ്രതീക്ഷിക്കുന്നു.