ഓൺലൈൻ വാതുവെപ്പ് കേസ്: ഇഡിക്ക്‌ മുന്നിൽ ഹാജരായി ശിഖർ ധവാൻ

ന്യൂഡൽഹി: ഓൺലൈൻ വാതുവെപ്പ് ആപ്പുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ഇന്ത്യൻ ക്രിക്കറ്റ് താരം ശിഖർ ധവാനെ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) ചോദ്യം ചെയ്യാനായി വിളിപ്പിച്ചു. സോഷ്യൽ മീഡിയയിൽ അനധികൃത വാതുവെപ്പ് പ്ലാറ്റ്‌ഫോമായ 1xBet-നെ ധവാൻ പ്രോത്സാഹിപ്പിച്ചതായി കണ്ടെത്തിയതിനെ തുടർന്നാണ് ഇഡിയുടെ ഈ നീക്കം. കള്ളപ്പണം വെളുപ്പിക്കൽ നിരോധന നിയമം (PMLA) പ്രകാരം ധവാന്റെ മൊഴി രേഖപ്പെടുത്തുമെന്ന് അന്വേഷണ ഏജൻസി അറിയിച്ചു.

39 വയസ്സുള്ള മുൻ ഇന്ത്യൻ ക്രിക്കറ്റ് താരത്തിന് ചില പരസ്യ കരാറുകളിലൂടെ വാതുവെപ്പ് ആപ്പുമായി ബന്ധമുണ്ടെന്നാണ് ഇഡിയുടെ നിഗമനം. ഈ ബന്ധത്തെക്കുറിച്ച് കൂടുതൽ വിവരങ്ങൾ അറിയുന്നതിനായാണ് ചോദ്യം ചെയ്യൽ. രാജ്യത്തെ വൻതോതിൽ നികുതി വെട്ടിക്കുകയും നിക്ഷേപകരെ കബളിപ്പിക്കുകയും ചെയ്യുന്ന അനധികൃത ഓൺലൈൻ വാതുവെപ്പ് ആപ്പുകൾക്കെതിരെ ഇ.ഡി. നേരത്തെ തന്നെ അന്വേഷണം നടത്തി വന്നിരുന്നു.

കഴിഞ്ഞ മാസം, ഈ കേസുമായി ബന്ധപ്പെട്ട് മുൻ ക്രിക്കറ്റ് താരം സുരേഷ് റെയ്‌നയെയും ഇഡി ചോദ്യം ചെയ്തിരുന്നു. റിയൽ മണി ഓൺലൈൻ ഗെയിമിംഗിന് കേന്ദ്ര സർക്കാർ അടുത്തിടെ നിരോധനം ഏർപ്പെടുത്തിയിരുന്നു. അതിന് പിന്നാലെയാണ് പ്രമുഖ താരങ്ങളെ അന്വേഷണ ഏജൻസികൾ ചോദ്യം ചെയ്യുന്നത്. വാതുവെപ്പ് ആപ്പുകളുമായി ബന്ധപ്പെട്ട സാമ്പത്തിക ഇടപാടുകളെക്കുറിച്ചും താരങ്ങളുടെ പങ്കിനെക്കുറിച്ചും വിശദമായ അന്വേഷണം നടക്കുമെന്നാണ് സൂചന.