ആൻഡ്രോയിഡ് ഉപഭോക്താക്കൽ ജാഗ്രത; ഇന്ത്യൻ സർക്കാരിന്റെ സുരക്ഷാ മുന്നറിയിപ്പ്!

നിങ്ങൾ ഒരു ആൻഡ്രോയിഡ് ഫോൺ ഉപയോഗിക്കുന്നയാളാണെങ്കിൽ, ഉടൻ തന്നെ നിങ്ങളുടെ ഫോൺ സുരക്ഷിതമാക്കേണ്ടത് അത്യാവശ്യമാണ്. രാജ്യത്തെ ദശലക്ഷക്കണക്കിന് വരുന്ന ആൻഡ്രോയിഡ് ഉപയോക്താക്കൾക്ക് ഇന്ത്യൻ സർക്കാർ ഈ ആഴ്ച ഒരു സുപ്രധാന സുരക്ഷാ മുന്നറിയിപ്പ് നൽകിയിരിക്കുകയാണ്. ആൻഡ്രോയിഡ് ഓപ്പറേറ്റിംഗ് സിസ്റ്റത്തിൽ കണ്ടെത്തിയ ഗുരുതരമായ ചില സുരക്ഷാ പിഴവുകളെക്കുറിച്ചാണ് ഇന്ത്യൻ കമ്പ്യൂട്ടർ എമർജൻസി റെസ്‌പോൺസ് ടീം (CERT-In) മുന്നറിയിപ്പ് നൽകിയിരിക്കുന്നത്.

ഈ പിഴവുകൾ കാരണം സൈബർ ആക്രമണകാരികൾക്ക് നിങ്ങളുടെ ഫോണിലെ സ്വകാര്യ വിവരങ്ങൾ എളുപ്പത്തിൽ ചോർത്താൻ സാധിക്കുമെന്നും, ഫോണിന്റെ പ്രവർത്തനത്തെ താറുമാറാക്കാൻ സാധ്യതയുണ്ടെന്നും CERT-In വ്യക്തമാക്കി. ഗൂഗിൾ പുറത്തിറക്കിയ നിർണായക സുരക്ഷാ ബുള്ളറ്റിനിന്റെ പശ്ചാത്തലത്തിലാണ് ഈ മുന്നറിയിപ്പ്.

പുതിയ സുരക്ഷാ മുന്നറിയിപ്പ് ഒരു ‘ഉയർന്ന തീവ്രത’ വിഭാഗത്തിലാണ് ഉൾപ്പെടുത്തിയിരിക്കുന്നത്. ഇത് ആൻഡ്രോയിഡിന്റെ പ്രധാന ഘടകങ്ങളിലായ ഫ്രെയിംവർക്ക്, ആൻഡ്രോയിഡ് റൺടൈം, സിസ്റ്റം, വൈഡ്‌വൈൻ DRM, പ്രോജക്റ്റ് മെയിൻലൈൻ, കേർണൽ എന്നിവയിലെ പിഴവുകൾ കാരണമാണ് ഉണ്ടാകുന്നത്. കൂടാതെ, മീഡിയടെക്, ക്വാൽകോം പോലുള്ള പ്രോസസ്സർ നിർമ്മാതാക്കളുടെ ഘടകങ്ങളിലെ പ്രശ്‌നങ്ങളും ഇതിന് കാരണമാകാം.

ഇത് ആൻഡ്രോയിഡിന്റെ ഹാർഡ്‌വെയർ, സോഫ്റ്റ്‌വെയർ ഭാഗങ്ങളെ ഒരുപോലെ ബാധിക്കുന്നതിനാൽ, ആൻഡ്രോയിഡ് ഫോണുകൾ നിർമ്മിക്കുന്ന മിക്ക കമ്പനികളെയും ഇത് അപകടത്തിലാക്കുന്നു. ഗൂഗിളിന്റെ മുന്നറിയിപ്പ് അനുസരിച്ച്, ഈ പ്രശ്‌നങ്ങളിൽ ചിലത് സൈബർ ആക്രമണകാരികൾ ഇതിനകം തന്നെ ചൂഷണം ചെയ്തിട്ടുണ്ടാവാം.

പുതിയ സുരക്ഷാ ഭീഷണി എല്ലാ ആൻഡ്രോയിഡ് പതിപ്പുകൾക്കും ബാധകമാണ്. നിങ്ങൾ ആൻഡ്രോയിഡ് 13, 14, 15, അല്ലെങ്കിൽ ഏറ്റവും പുതിയ ആൻഡ്രോയിഡ് 16 പതിപ്പ് ഉപയോഗിക്കുന്ന ആളാണെങ്കിൽ പോലും ഈ അപകടസാധ്യത നിലനിൽക്കുന്നുണ്ട്. അതുകൊണ്ട് തന്നെ നിങ്ങളുടെ ഫോണിലെ വ്യക്തിഗത വിവരങ്ങൾ, ബാങ്കിംഗ് വിവരങ്ങൾ, മറ്റ് പ്രധാനപ്പെട്ട രേഖകൾ എന്നിവയെല്ലാം സൈബർ ആക്രമണകാരികളുടെ കൈകളിലേക്ക് എത്താനുള്ള സാധ്യതയുണ്ട്.

ഈ ഗുരുതരമായ സുരക്ഷാ പ്രശ്നങ്ങൾ പരിഹരിക്കുന്നതിനായി ഗൂഗിൾ ഇതിനകം തന്നെ ഒരു സുരക്ഷാ പാച്ച് (Security Patch) പുറത്തിറക്കിയിട്ടുണ്ട്. എല്ലാ ആൻഡ്രോയിഡ് ഉപയോക്താക്കളും ഈ സുരക്ഷാ പാച്ച് ഉടൻ തന്നെ ഇൻസ്റ്റാൾ ചെയ്യണം. ഈ അപ്‌ഡേറ്റ് ഗൂഗിളിന്റെ പിക്‌സൽ ഫോണുകൾക്ക് മാത്രമായി പരിമിതപ്പെടുത്തിയിട്ടില്ല. സാംസങ്, വൺപ്ലസ്, ഷവോമി തുടങ്ങി എല്ലാ കമ്പനികളും വരും ദിവസങ്ങളിൽ ഈ അപ്‌ഡേറ്റുകൾ അവരുടെ ഫോണുകളിൽ ലഭ്യമാക്കും.

നിങ്ങളുടെ ഫോൺ സുരക്ഷിതമാക്കാൻ താഴെ പറയുന്ന ഘട്ടങ്ങൾ പാലിക്കുക.

1. നിങ്ങളുടെ ഫോണിലെ Settings (ക്രമീകരണങ്ങൾ) ലേക്ക് പോകുക.
2. System Update (സിസ്റ്റം അപ്‌ഡേറ്റ്) എന്ന ഓപ്ഷനിലേക്ക് താഴേക്ക് സ്ക്രോൾ ചെയ്യുക.
3. പുതിയ അപ്‌ഡേറ്റ് വന്നിട്ടുണ്ടോ എന്ന് പരിശോധിക്കുക.
4. അപ്‌ഡേറ്റ് ഇൻസ്റ്റാൾ ചെയ്ത് ഫോൺ റീബൂട്ട് ചെയ്യുക.
5. കമ്പനികളിൽ നിന്ന് അപ്‌ഡേറ്റ് ലഭിക്കാത്തവർ അല്പം കൂടി കാത്തിരിക്കുക.
6. നിങ്ങളുടെ ഫോൺ നിർമ്മാതാക്കൾ ഉടൻ തന്നെ ഈ സുരക്ഷാ പാച്ച് ലഭ്യമാക്കും.
7. ഈ അപ്‌ഡേറ്റ് ഇൻസ്റ്റാൾ ചെയ്യുന്നതിലൂടെ നിങ്ങളുടെ ഫോണും അതിലെ വിവരങ്ങളും സുരക്ഷിതമാക്കാൻ സാധിക്കും.