സ്വാതന്ത്ര്യദിന സുരക്ഷയുടെ ഭാഗമായി ഡൽഹി വിമാനത്താവളത്തിൽ കർശനമായ വ്യോമനിയന്ത്രണങ്ങൾ ഏർപ്പെടുത്തി. ഓഗസ്റ്റ് 15-ന് രാവിലെയും വൈകുന്നേരവും ഷെഡ്യൂൾ ചെയ്യാത്തതും ചാർട്ടേഡ് വിമാനങ്ങൾക്കും നിയന്ത്രണങ്ങൾ ബാധകമായിരിക്കും. എയർപോർട്ട് അതോറിറ്റി ഓഫ് ഇന്ത്യ പുറപ്പെടുവിച്ച നോട്ടാം പ്രകാരമാണ് ഈ സുരക്ഷാ ക്രമീകരണങ്ങൾ നടപ്പിലാക്കുന്നത്. അതേസമയം, സാധാരണ ഷെഡ്യൂൾ ചെയ്ത വാണിജ്യ വിമാന സർവീസുകളെ ഈ നിയന്ത്രണങ്ങൾ ബാധിക്കില്ലെന്നും, ആഭ്യന്തര, അന്തർദേശീയ വിമാനങ്ങൾ പതിവുപോലെ സർവീസ് നടത്തുമെന്നും അധികൃതർ അറിയിച്ചു.
ഇന്ത്യൻ വ്യോമസേന, ബി.എസ്.എഫ്, ആർമി ഏവിയേഷൻ എന്നിവയുടെ വിമാനങ്ങൾക്കും ഹെലികോപ്റ്ററുകൾക്കും ഈ നിയന്ത്രണങ്ങൾ ബാധകമല്ല. ഉന്നത ഉദ്യോഗസ്ഥരെ വഹിക്കുന്ന സർക്കാർ വിമാനങ്ങൾക്കും അടിയന്തര മെഡിക്കൽ സേവനങ്ങൾക്കുള്ള വിമാനങ്ങൾക്കും ഈ നിയന്ത്രണങ്ങളിൽ പൂർണ്ണ ഇളവുണ്ടാകും. പ്രധാനമന്ത്രിയും പ്രമുഖ വ്യക്തികളും പങ്കെടുക്കുന്ന ചെങ്കോട്ടയിലെ സ്വാതന്ത്ര്യദിന ആഘോഷങ്ങളുടെ സുരക്ഷ ഉറപ്പാക്കുന്നതിന്റെ ഭാഗമായി ചെങ്കോട്ടയ്ക്ക് ചുറ്റും പ്രത്യേക ‘നോ-ഫ്ലൈ സോൺ’ ഡൽഹി പോലീസ് ഏർപ്പെടുത്തിയിട്ടുണ്ട്. വിമാനങ്ങൾക്ക് പുറമെ ഡ്രോണുകൾ, പാരാഗ്ലൈഡറുകൾ, ഹോട്ട്-എയർ ബലൂണുകൾ, പട്ടങ്ങൾ എന്നിവ പറത്തുന്നതിനും കർശന നിരോധനമുണ്ട്. സുരക്ഷാ ഉദ്യോഗസ്ഥരുടെ ഈ നിർദ്ദേശങ്ങൾ ലംഘിക്കുന്നവർക്കെതിരെ ഉടനടി കർശന നിയമനടപടികൾ സ്വീകരിക്കുന്നതായിരിക്കും.