അയോധ്യ രാമക്ഷേത്രത്തിലെ സംഭാവനകളിൽ തട്ടിപ്പ് നടന്നെന്ന ആരോപണത്തെത്തുടർന്ന് ഉത്തർപ്രദേശ് സർക്കാർ പ്രത്യേക അന്വേഷണ സംഘത്തെ നിയോഗിച്ചു. ലഖ്നൗ ഡിവിഷണൽ കമ്മീഷണർ വിജയ് വിശ്വാസ് പന്തിന്റെ നേതൃത്വത്തിലുള്ള മൂന്നംഗ സംഘം ക്ഷേത്രത്തിൽ നേരിട്ടെത്തി എട്ടു മണിക്കൂറിലധികം നീണ്ട വിശദമായ പരിശോധന നടത്തി. സമാജ്വാദി പാർട്ടി അധ്യക്ഷൻ അഖിലേഷ് യാദവ് ഉന്നയിച്ച ആരോപണങ്ങളുടെ അടിസ്ഥാനത്തിൽ മുഖ്യമന്ത്രി യോഗി ആദിത്യനാഥാണ് അന്വേഷണത്തിന് ഉത്തരവിട്ടത്.
ക്ഷേത്രത്തിലെ സംഭാവന പെട്ടികൾ തുറക്കുന്നത് മുതൽ ബാങ്ക് നിക്ഷേപം വരെയുള്ള എല്ലാ ഘട്ടങ്ങളും എസ്.ഐ.ടി സൂക്ഷ്മമായി വിലയിരുത്തി. സ്റ്റേറ്റ് ബാങ്ക് ഓഫ് ഇന്ത്യയുടെ നേതൃത്വത്തിൽ സ്വകാര്യ ഏജൻസിയാണ് പണം എണ്ണുന്നത്. ഈ പ്രക്രിയയിൽ പങ്കെടുക്കുന്ന 50-ഓളം ജീവനക്കാരുടെ വിവരങ്ങൾ, സി.സി.ടി.വി ദൃശ്യങ്ങൾ, എൻട്രി-എക്സിറ്റ് രജിസ്റ്ററുകൾ, കഴിഞ്ഞ ഒരു വർഷത്തിനിടെ ജോലിയിൽ നിന്ന് വിരമിച്ചവരുടെ വിവരങ്ങൾ എന്നിവ സംഘം ശേഖരിച്ചു. പണം എണ്ണുന്നതുമായി ബന്ധപ്പെട്ട ക്രമക്കേടിൽ നേരത്തെ ഒരു ക്ഷേത്രജീവനക്കാരനെ പോലീസ് കസ്റ്റഡിയിലെടുത്തിരുന്നു. ഇയാളുടെ വീട്ടിൽനിന്ന് ലക്ഷക്കണക്കിന് രൂപ കണ്ടെടുത്തത് അന്വേഷണത്തെ നിർണ്ണായകമാക്കുന്നു.
സംഭാവന പെട്ടികളിൽനിന്ന് ലഭിച്ച തുകയും ബാങ്കിൽ നിക്ഷേപിച്ച തുകയും തമ്മിൽ പൊരുത്തക്കേടുകളുണ്ടോ എന്നാണ് പ്രധാനമായും പരിശോധിക്കുന്നത്. അന്വേഷണത്തിന്റെ ഭാഗമായി രാമക്ഷേത്ര സമുച്ചയത്തിൽ എസ്.ഐ.ടി താൽക്കാലിക ഓഫീസ് തുറന്നിട്ടുണ്ട്. 15 ദിവസത്തിനുള്ളിൽ റിപ്പോർട്ട് സമർപ്പിക്കാനാണ് സർക്കാരിന്റെ നിർദ്ദേശം.