അടിപൊളി സോഫ്റ്റ് വെയർ അപ്ഡേറ്റുമായി അൾട്രാവയലറ്റിൻ്റെ ഇലക്ട്രിക് ബൈക്കുകൾ

അൾട്രാവയലറ്റ് അവരുടെ ഇലക്ട്രിക് ബൈക്കുകൾക്കായി ഒരു പുതിയ സോഫ്റ്റ് വെയർ അപ്ഡേറ്റ് പുറത്തിറക്കി. ഈ സോഫ്റ്റ്‌വെയർ അപ്‌ഡേറ്റിൽ F77 മാക് 2, F77 സൂപ്പർസ്ട്രീറ്റ് ഇലക്ട്രിക് മോട്ടോർസൈക്കിളുകൾ ഉൾപ്പടെയുള്ള എല്ലാ മോഡലുകൾക്കും ബാലിസ്റ്റിക്+ റൈഡിംഗ് മോഡ് അപ​ഗ്രേഡ് ലഭിക്കും. പുതിയ സോഫ്റ്റ്‌വെയർ അപ്‌ഡേറ്റിൽ പുതുക്കിയ ത്രോട്ടിൽ മാപ്പുമുണ്ട്. ജെൻ 3 പവർട്രെയിൻ ഫേംവയറുമായി പെയർ ചെയ്ത പുതിയ റൈഡിങ് മോഡ് മികച്ച പവർ-പാക്ക്ഡ് പെർഫോമൻസ് നൽകുന്നു.

അതേസമയം മികച്ച ടോർക്ക് ഡെലിവറിക്ക് വേണ്ടി പുതുക്കിയ ത്രോട്ടിൽ മാപ്പ് ആണ് ഈ അപഡേറ്റിൽ ലഭിക്കുന്നത്. F77 ഇലക്ട്രിക് വാഹനം സ്വന്തമാക്കിയ എല്ലാവർക്കും ഈ അപ്ഡേറ്റ് സൗജന്യമായി ലഭിക്കുമെന്ന് കമ്പനി അധികൃതർ വ്യക്തമാക്കിയിട്ടുണ്ട്. അപ്ഡേറ്റ് ഉണ്ടെങ്കിലും ഇലക്ട്രിക് ബൈക്കുകളുടെ വിലയിൽ വ്യത്യാസമൊന്നുമില്ല. 30 കിലോമീറ്ററിൽ താഴെ വേഗതയിൽ സഞ്ചരിക്കാൻ കഴിയുന്ന ടോർക്കായിരുന്നു അൾട്രാവയലറ്റ് F77 മാക് 2 ബൈക്കിൽ ഉണ്ടായിരുന്നത്.

അപ്ഡേറ്റിലൂടെ വാഹനത്തിന്റെ ഇനീഷ്യൽ ആക്സിലറേഷനിലൂടെ മികച്ച പ്രകടനം കാഴ്ചവെക്കാൻ കഴിയുമെന്നാണ് റിപ്പോർട്ടുകൾ സൂചിപ്പിക്കുന്നത്. പുതുക്കിയ ത്രോട്ടിൽ മാപ്പ് എന്ന അപ്ഡേറ്റ് അല്ലാതെ രണ്ട് സൂപ്പർ ബൈക്കുകളിലും ടെക്നിക്കലായി വ്യത്യാസങ്ങൾ ഒന്നുമില്ല. F77 മാക് 2-നും F77 സൂപ്പർസ്ട്രീറ്റിനും ഒരേ 7.1 kWh ബാറ്ററി പായ്ക്കാണുള്ളത്. ഇതിലൂടെ ഒറ്റ ചാർജിൽ 211 കിലോമീറ്റർ റേഞ്ചാണ് ലഭിക്കുക. രണ്ട് ഇലക്ട്രിക് വാഹനങ്ങളിലും 30 kW ഇലക്ട്രിക് മോട്ടോറാണ് ഉപയോഗിക്കുന്നത്. ഇത് മണിക്കൂറിൽ 155 കിലോമീറ്റർ വേഗത നൽകുന്നു.