പറന്നുകൊണ്ടിരുന്ന ഇൻഡിഗോ വിമാനത്തിനുള്ളിൽ യാത്രാ നിയമങ്ങൾ ലംഘിച്ച് ചില യാത്രക്കാർ നടത്തിയ മോശം പെരുമാറ്റം സമൂഹമാധ്യമങ്ങളിൽ വലിയ വിവാദത്തിന് തിരികൊളുത്തി. നീരജ് പ്രിയങ്ക ചൗധരി ഇൻസ്റ്റഗ്രാമിൽ പങ്കുവെച്ച ഒരു വീഡിയോയാണ് ഇപ്പോൾ വ്യാപകമായ ചർച്ചകൾക്ക് കാരണമായിരിക്കുന്നത്. വിമാനത്തെ ഒരു ‘ലോക്കൽ ട്രെയിൻ’ പോലെയാണ് ഇവർ ഉപയോഗിച്ചതെന്നാണ് സോഷ്യൽ മീഡിയയുടെ വിമർശനം.
തായ്‌ലാൻഡിലെ ക്രാബിയിൽനിന്ന് ഡൽഹിയിലേക്കുള്ള ഇൻഡിഗോ വിമാനത്തിലായിരുന്നു ഈ സംഭവം നടന്നത്. വിമാനത്തിന്റെ മുൻനിര സീറ്റുകൾക്ക് സമീപമുള്ള ഇടനാഴിയിൽ യാത്രക്കാർ കൂട്ടത്തോടെ നിൽക്കുന്നതും, സീറ്റിലിരിക്കാതെ മറ്റു സീറ്റുകളിലുള്ള ബന്ധുക്കളോട് സംസാരിക്കുന്നതും, പരസ്പരം ഭക്ഷണം കൈമാറുന്നതുമെല്ലാം വീഡിയോയിൽ വ്യക്തമായി കാണാം. വിമാന ജീവനക്കാർ യാത്രക്കാരോട് തിരികെ സീറ്റുകളിൽ ഇരിക്കാൻ പലതവണ ആവശ്യപ്പെട്ടെങ്കിലും, ഇവർ അതൊന്നും വകവെയ്ക്കാതെ അകത്തളത്തിൽ നടന്നുനീങ്ങുന്നത് തുടരുകയായിരുന്നു.
വിമാനത്തിന്റെ ഒന്നാം നിരയിലും അഞ്ചാം നിരയിലും ഇരുന്നവരാണ് പ്രധാനമായും ഈ രീതിയിൽ നിയമലംഘനം നടത്തിയത്. യാത്രാവേളയിൽ ശക്തമായ ടർബുലൻസിനുള്ള സാധ്യതയുള്ളതിനാൽ സീറ്റ് ബെൽറ്റ് ധരിക്കണമെന്ന് നിർദ്ദേശം വന്നിട്ടും ഇവർ സീറ്റിലിരിക്കാൻ കൂട്ടാക്കിയില്ലെന്ന് നീരജ് ചൂണ്ടിക്കാണിക്കുന്നു. ആകാശത്ത് പറക്കുമ്പോൾ പാലിക്കേണ്ട അടിസ്ഥാന പൗരബോധമോ സുരക്ഷാ മാനദണ്ഡങ്ങളോ പോലും പാലിക്കാത്ത ഇത്തരം പ്രവണതകൾ മറ്റ് യാത്രക്കാർക്കും വലിയ ബുദ്ധിമുട്ടാണ് സൃഷ്ടിക്കുന്നത്.