പ്രമുഖ ടെക് ബ്രാൻഡായ അസൂസ്, ആർട്ടിഫിഷ്യൽ ഇന്റലിജൻസ് സാങ്കേതികവിദ്യയിൽ പ്രവർത്തിക്കുന്ന തങ്ങളുടെ ഏറ്റവും പുതിയ ഫ്ലാഗ്ഷിപ്പ് ബിസിനസ് ലാപ്ടോപ്പായ ‘എക്സ്പെർട്ട്ബുക്ക് അൾട്ര’ ഇന്ത്യൻ വിപണിയിൽ അവതരിപ്പിച്ചു. വെറും 0.99 കിലോഗ്രാം മാത്രം ഭാരമുള്ള ഈ ലാപ്ടോപ്പ് ഭാരം കുറഞ്ഞതും എന്നാൽ കരുത്തുറ്റതുമായ ഡിസൈനിലാണ് നിർമ്മിച്ചിരിക്കുന്നത്. ഇന്റൽ കോർ അൾട്രാ സീരീസ് 3 പ്രോസസറുകൾ കരുത്ത് പകരുന്ന ഈ ഉപകരണം, പ്രീ-ഓർഡർ ചെയ്യുന്നവർക്കായി ആകർഷകമായ ഓഫറുകളും വാഗ്ദാനം ചെയ്യുന്നുണ്ട്. 2,39,990 രൂപ മുതലാണ് ഇതിന്റെ പ്രാരംഭ വില.
ഏറ്റവും പുതിയ AI ഫീച്ചറുകൾ ഉൾക്കൊള്ളുന്ന എക്സ്പെർട്ട്ബുക്ക് അൾട്രയിൽ 14 ഇഞ്ച് 3K OLED ഡിസ്പ്ലേയാണുള്ളത്. 64 ജിബി റാമും 2 ടിബി വരെ സ്റ്റോറേജും നൽകുന്ന ഈ ലാപ്ടോപ്പ് പ്രൊഫഷണലുകൾക്ക് മികച്ച പ്രവർത്തനക്ഷമത ഉറപ്പാക്കുന്നു. ഡോൾബി അറ്റ്മോസ് പിന്തുണയുള്ള ആറ് സ്പീക്കർ ഓഡിയോ സിസ്റ്റവും 26 മണിക്കൂർ വരെ നീണ്ടുനിൽക്കുന്ന ബാറ്ററി ലൈഫും ഇതിന്റെ പ്രത്യേകതയാണ്. തത്സമയ വിവർത്തനം, നോയ്സ് ക്യാൻസലേഷൻ തുടങ്ങിയ എഐ അധിഷ്ഠിത സേവനങ്ങളും ഇതിൽ ലഭ്യമാണ്. പ്രീ-ഓർഡർ ചെയ്യുന്നവർക്ക് വാറന്റി ആനുകൂല്യങ്ങളും ബാങ്ക് ഡിസ്കൗണ്ടുകളും കമ്പനി പ്രഖ്യാപിച്ചിട്ടുണ്ട്.
അൾട്ര മോഡലിനൊപ്പം തന്നെ മിതമായ നിരക്കിൽ എക്സ്പെർട്ട്ബുക്ക് പി3 (P3), പി5 (P5) സീരീസുകളും അസൂസ് വിപണിയിലെത്തിച്ചിട്ടുണ്ട്. 94,990 രൂപ മുതൽ ആരംഭിക്കുന്ന പി-സീരീസ് ലാപ്ടോപ്പുകൾ വിവിധ ബിസിനസ് ആവശ്യങ്ങൾക്കായി പ്രത്യേകമായി രൂപകൽപ്പന ചെയ്തതാണ്. സൈനിക നിലവാരത്തിലുള്ള കരുത്തും, വാട്ടർ റെസിസ്റ്റന്റ് കീബോർഡും ഈ ലാപ്ടോപ്പുകളുടെ സവിശേഷതയാണ്. 70Wh വരെയുള്ള ബാറ്ററി ശേഷിയും വൈ-ഫൈ 7 പോലുള്ള നൂതന കണക്റ്റിവിറ്റി സംവിധാനങ്ങളും ഈ മോഡലുകൾ വാഗ്ദാനം ചെയ്യുന്നു. ഏപ്രിൽ 22 മുതൽ ഫ്ലിപ്കാർട്ടിലൂടെ ഈ ലാപ്ടോപ്പുകൾ സ്വന്തമാക്കാവുന്നതാണ്.