കോഴിക്കോട് നഗരത്തിൽ ഥാർ മൂന്ന് വാഹനങ്ങളിൽ ഇടിച്ചതിന് പിന്നാലെ യൂട്യൂബർ അശ്വന്ത് കോക്കിനെ പോലീസ് കസ്റ്റഡിയിലെടുത്തു. മദ്യപിച്ച് വാഹനമോടിച്ചതാണോ അപകടത്തിന് കാരണമെന്ന സംശയത്തിലാണ് നടപടി. ഇന്ന് വൈകിട്ടാണ് കോഴിക്കോട് നടക്കാവിൽ സംഭവം നടന്നത്. അശ്വന്ത് കോക്ക് ഓടിച്ചിരുന്ന ഥാർ മറ്റ് മൂന്ന് വാഹനങ്ങളിൽ ഇടിക്കുകയായിരുന്നു.
അപകടത്തിന് പിന്നാലെ ഇടിച്ച വാഹനങ്ങളുടെ ഉടമകളും പ്രദേശവാസികളും ചേർന്ന് ഇയാളെ തടഞ്ഞുവെച്ചു. വിവരമറിഞ്ഞെത്തിയ നടക്കാവ് പോലീസ് ഇയാളെ കസ്റ്റഡിയിലെടുക്കാൻ ശ്രമിക്കുന്നതിനിടെ പോലീസുകാരോട് തട്ടിക്കയറിയതായും പറയുന്നു. അപകടസമയത്ത് ഇയാൾ മദ്യപിച്ചിരുന്നതായി നാട്ടുകാർ ആരോപണമുന്നയിച്ചിട്ടുണ്ട്. എന്നാൽ മദ്യപിച്ചിരുന്നോ എന്നത് വൈദ്യപരിശോധനയിലൂടെയാണ് വ്യക്തമാകേണ്ടത്.
പോലീസ് ഇയാളെ നടക്കാവ് പോലീസ് സ്റ്റേഷനിലേക്ക് കൊണ്ടുപോയി. അപകടത്തിൽപ്പെട്ട ഥാർ ജീപ്പും പോലീസ് സ്റ്റേഷനിലേക്ക് മാറ്റി. തുടർന്ന് മദ്യപിച്ചിരുന്നോ എന്ന് പരിശോധിക്കുന്നതിനായി അശ്വന്ത് കോക്കിനെ കോഴിക്കോട് ബീച്ച് ആശുപത്രിയിലേക്ക് വൈദ്യപരിശോധനയ്ക്കായി മാറ്റി.
അപകടത്തിന്റെ കൃത്യമായ കാരണം ഉൾപ്പെടെയുള്ള കാര്യങ്ങളിൽ പോലീസ് തുടർനടപടികൾ സ്വീകരിച്ചുവരികയാണ്. വൈദ്യപരിശോധനാ ഫലവും പോലീസ് അന്വേഷണവും പുറത്തുവരുന്നതോടെ മദ്യപിച്ച് വാഹനമോടിച്ചിരുന്നോ എന്നതടക്കമുള്ള കാര്യങ്ങളിൽ കൂടുതൽ വ്യക്തത ലഭിക്കും.