മെസ്സിയുടെ പത്താം നമ്പർ ജേഴ്സി ഇനി ആരണിയുമെന്ന ചോദ്യത്തിന് ഉത്തരമാകുന്നു. അർജന്റീനയുടെ യുവതാരം നിക്കോ പാസ് ആയിരിക്കും മെസ്സിക്ക് ശേഷം ദേശീയ ടീമിലെ പത്താം നമ്പർ ജേഴ്സി അണിയുകയെന്നാണ് റിപ്പോർട്ടുകൾ. പരിശീലകൻ ലയണൽ സ്കലോണി തന്നെ നിക്കോ പാസിൽ വിശ്വാസമർപ്പിച്ചതായാണ് വിവരം. ഇറ്റാലിയൻ ക്ലബ് കോമോയ്ക്കായി കളിക്കുന്ന നിക്കോ പാസ് അർജന്റീനയുടെ ഭാവി സൂപ്പർതാരമാകുമെന്നാണ് ഫുട്ബോൾ നിരീക്ഷകരുടെ വിലയിരുത്തൽ. ദേശീയ ടീമിൽ നിന്ന് മെസ്സി വിരമിക്കുന്നതോടെ ഉണ്ടാകുന്ന വലിയ വിടവ് നികത്താൻ സ്കലോണിക്ക് മുന്നിലുള്ള പ്രധാന ദൗത്യങ്ങളിലൊന്നാണ് പത്താം നമ്പറിന് അനുയോജ്യനായ താരത്തെ കണ്ടെത്തുക എന്നത്.
മെസ്സിയോടുള്ള ആദരസൂചകമായി പത്താം നമ്പർ ജേഴ്സി വിരമിപ്പിക്കുന്നതിനെക്കുറിച്ച് അർജന്റീന ഫുട്ബോൾ അസോസിയേഷൻ ആദ്യം ആലോചിച്ചിരുന്നു. എന്നാൽ ഫിഫ ടൂർണമെന്റുകളിൽ ഇത് സാധ്യമല്ല. ഫിഫ ചട്ടപ്രകാരം ടൂർണമെന്റുകളിൽ പങ്കെടുക്കുന്ന ടീമുകളുടെ ജേഴ്സി നമ്പറുകൾ ഒന്ന് മുതൽ 26 വരെ ആയിരിക്കണം. അതിനാൽ മെസ്സിക്ക് ശേഷം മറ്റൊരു താരത്തിന് പത്താം നമ്പർ നൽകേണ്ടിവരും. അർജന്റീന ടീമിൽ നിരവധി താരങ്ങളുണ്ടെങ്കിലും നിക്കോ പാസിനോടുള്ള സ്കലോണിയുടെ വിശ്വാസമാണ് അദ്ദേഹത്തെ അടുത്ത പത്താം നമ്പറുകാരനായി പരിഗണിക്കാൻ പ്രധാന കാരണം.
അതിനിടെ മെസ്സിക്ക് ആദരമർപ്പിച്ച് അർജന്റീനയിലെ ലീഗ് മത്സരങ്ങളിൽ പ്രത്യേക പരിപാടിയും നടക്കും. വാരാന്ത്യത്തിൽ നടക്കുന്ന മത്സരങ്ങളുടെ പത്താം മിനിറ്റിൽ കളി ഒരു മിനിറ്റ് നിർത്തിവെച്ച് പൊതുവായി കൈയടി നൽകാനാണ് അർജന്റീന ഫുട്ബോൾ അസോസിയേഷൻ തീരുമാനിച്ചത്. അർജന്റീന ജേഴ്സിയിൽ മെസ്സി ധരിച്ചിരുന്ന പത്താം നമ്പറിനോടുള്ള ആദരസൂചകമായാണ് പത്താം മിനിറ്റ് ഇതിനായി തിരഞ്ഞെടുത്തത്. മെസ്സിയുടെ ദേശീയ ടീം വിടവാങ്ങലിന് പിന്നാലെ അദ്ദേഹത്തിന്റെ ജേഴ്സി നമ്പർ മറ്റൊരു യുവതാരത്തിലേക്ക് എത്തുമ്പോൾ, അർജന്റീനയുടെ അടുത്ത അധ്യായവും ശ്രദ്ധേയമാകുകയാണ്.