ഫിഫ ലോകകപ്പ്: ചരിത്ര നേട്ടം കൈവരിക്കുന്ന ഒരേയൊരു ടീമായി ബ്രസീല്‍

2026 ഫിഫ ലോകകപ്പിന് യോഗ്യത നേടിയിരിക്കുകയാണ് മുന്‍ ലോക ചാംപ്യന്മാരായ ബ്രസീല്‍. ഇന്ന് നടന്ന ലോകകപ്പ് യോഗ്യതാ പോരാട്ടത്തില്‍ പരാഗ്വേയെ കീഴടക്കിയാണ് ബ്രസീല്‍ ലോകകപ്പിന് യോഗ്യത നേടിയത്. വിനീഷ്യസ് ജൂനിയറിന്റെ ഒറ്റ ഗോളിലാണ് കാനറിപ്പട വിജയിച്ച് ലോകകപ്പ് യോഗ്യത നേടിയത്. ഇതോടെ ഒരു ചരിത്ര റെക്കോര്‍ഡും ബ്രസീലിന് സ്വന്തമായിരിക്കുകയാണ്. ഇതുവരെയുള്ള ലോകകപ്പിന്റെ എല്ലാ പതിപ്പിലും യോഗ്യത നേടുന്ന ഒരേയൊരു ദേശീയ ടീമായി മാറിയിരിക്കുകയാണ് ബ്രസീല്‍.

1930 മുതൽ 2026 വരെയുള്ള എല്ലാ ഫുട്‌ബോള്‍ ലോകകപ്പിനും യോഗ്യത നേടുന്ന ടീമായി ബ്രസീല്‍ മാറികഴിഞ്ഞു. അഞ്ച് ലോകകപ്പ് സ്വന്തമായുള്ള ബ്രസീല്‍ തന്നെയാണ് ഏറ്റവും കൂടുതല്‍ ലോക ചാംപ്യന്മാരായ ടീം. ഇതിഹാസ പരിശീലകന്‍ കാര്‍ലോ ആഞ്ചലോട്ടിക്ക് കീഴില്‍ ബ്രസീല്‍ സ്വന്തമാക്കുന്ന ആദ്യ വിജയം കൂടിയാണിത്. ബ്രസീലിന്റെ ചരിത്രത്തിലെ തന്നെ ആദ്യ വിദേശ പരിശീലകനായാണ് ആഞ്ചലോട്ടി കാനറികളുടെ തട്ടകത്തിലെത്തിയത്. ഇതോടെ ഒരു സ്ഥിര വിദേശ പരിശീലകന് കീഴിലുള്ള ആദ്യ ജയമെന്ന ചരിത്രവും ഈ വിജയത്തോടെ കാനറികള്‍ സ്വന്തമാക്കി.

പരാഗ്വേയ്ക്കെതിരായ മത്സരത്തില്‍ ആദ്യപകുതി അവസാനിക്കാന്‍ നിമിഷങ്ങള്‍ മാത്രം ബാക്കിനില്‍ക്കെ വിനീഷ്യസ് ജൂനിയറാണ് ബ്രസീലിന്റെ വിജയ ഗോള്‍ നേടിയത്. 44-ാം മിനിറ്റില്‍ മാത്യൂസ് കുഞ്ഞ്യയുടെ അവിശ്വസനീയമായ അസിസ്റ്റാണ് ഗോളിന് വഴിയൊരുക്കിയത്. ഈ ഗോള്‍ ബ്രസീലിന് ആദ്യ പകുതിക്ക് തൊട്ടുമുമ്പ് നിര്‍ണായകമായ ലീഡ് നല്‍കി. കാര്‍ലോ ആഞ്ചലോട്ടിക്ക് കീഴില്‍ ആദ്യ മത്സരത്തില്‍ ഇക്വഡോറിനോട് ഗോള്‍രഹിത സമനില വഴങ്ങിയ ബ്രസീലിന് പരാഗ്വേയ്ക്കെതിരെ വിജയം അനിവാര്യമായിരുന്നു. ഈ വിജയത്തോടെ യോഗ്യതാ മത്സരങ്ങളില്‍ 25 പോയന്റുമായി ബ്രസീല്‍ മൂന്നാം സ്ഥാനത്തെത്തി. 35 പോയന്റുമായി അര്‍ജന്റീനയാണ് ഒന്നാമത്.