പുതിയ ജിഎസ്ടി നിരക്ക് പ്രാബല്യത്തിൽ; റോയൽ എൻഫീൽഡ് മോഡലുകൾക്ക് വില കൂടും

കേന്ദ്രസർക്കാർ ചെറിയ വാഹനങ്ങളുടെ ജി.എസ്.ടി കുറച്ചപ്പോൾ, വലിയ എഞ്ചിനുകളുള്ള വാഹനങ്ങളുടെ നികുതി വർദ്ധിപ്പിച്ചത് ഇരുചക്രവാഹന വിപണിക്ക് തിരിച്ചടിയായി. ഇത് റോയൽ എൻഫീൽഡിന്റെ 650 സിസി മോട്ടോർസൈക്കിളുകളെയും ബാധിച്ചു. പുതിയ ജി.എസ്.ടി. നിരക്കുകൾ പ്രാബല്യത്തിൽ വന്നതോടെ ഈ മോഡലുകളുടെ വിലയിൽ വൻ വർധനവുണ്ടായി.

റോയൽ എൻഫീൽഡ് മോഡലുകളുടെ വില വർധനവ്

റോയൽ എൻഫീൽഡിന്റെ 650 സിസി മോഡലുകളുടെ പുതിയ വിലകൾ കമ്പനി പുറത്തുവിട്ടു. ഈ മോഡലുകൾക്ക് ഏകദേശം 30,000 രൂപയുടെ വർധനവാണ് ഉണ്ടായിരിക്കുന്നത്. താഴെ പറയുന്ന മോഡലുകൾക്കാണ് വില കൂടിയത്.

കോണ്ടിനെന്റൽ ജിടി 650

കഫേ റേസർ മോഡലായ കോണ്ടിനെന്റൽ ജിടി 650 ക്ക് വില വർധനവ് സംഭവിച്ചു. ബ്രിട്ടീഷ് റേസിംഗ് ഗ്രീൻ, റോക്കർ റെഡ് എന്നിവയുടെ വില ഇപ്പോൾ ബൈക്കിന് 3.49 ലക്ഷം രൂപയാണ്. അതായത് 23,712 രൂപയുടെ വർധനവ്. അപെക്സ് ഗ്രേ, സ്ലിപ്പ് സ്ട്രീം ബ്ലൂ എന്നിവയുടെ വില 3.71 ലക്ഷം രൂപയാണ്.

ഇന്റർസെപ്റ്റർ 650

ജനപ്രിയ ഇന്റർസെപ്റ്റർ 650 യുടെ കാലി ഗ്രീൻ, കാന്യൺ റെഡ് എന്നിവയുടെ വില ഇപ്പോൾ 3.32 ലക്ഷം രൂപയിൽ ആരംഭിക്കുന്നു. മുമ്പ് 3.09 ലക്ഷം രൂപയായിരുന്നു ഇത്. അതായത് 22,522 രൂപയുടെ വർധനവ്.

ക്ലാസിക് 650

ക്ലാസിക് 650 റെട്രോ ക്രൂയിസറിനും സമാനമായ വില വർധനവ് ലഭിച്ചു. വല്ലം റെഡ്, ബ്രണ്ടിംഗ്തോർപ്പ് ബ്ലൂ വേരിയന്റുകൾക്ക് ഇപ്പോൾ 3.61 ലക്ഷം രൂപ ആണ് വില. 24,633 രൂപ കൂടി.

ഷോട്ട്ഗൺ 650

ഷോട്ട്ഗൺ 650 നും വില വർധിച്ചിട്ടുണ്ട്. പ്ലാസ്മ ബ്ലൂ, ഡ്രിൽ ഗ്രീൻ വേരിയന്റുകൾക്ക് 27,674 രൂപയുടെ വർധനവോടെ 4.05 ലക്ഷം രൂപയും സ്റ്റെൻസിൽ വൈറ്റ് വേരിയന്റിന് 27,889 രൂപയുടെ വർധനവോടെ 4.08 ലക്ഷം രൂപയുമാണ് വില.

റോയൽ എൻഫീൽഡ് ബെയർ 650

റോയൽ എൻഫീൽഡിന്റെ സ്‌ക്രാംബ്ലർ ശൈലിയിലുള്ള മെഷീനായ ബെയർ 650 നും വില വർദ്ധനവ് ബാധകമാണ്. ബോർഡ് വാക്കിന്റെ വില 3.71 ലക്ഷം രൂപ (25,345 രൂപ കൂടി). വൈൽഡ് ഹണി, പെട്രോൾ ഗ്രീൻ എന്നിവയുടെ വില ട്രിമിന് 3.77 ലക്ഷം രൂപ (25,720 രൂപ കൂടി).