2026-ലെ ഫിഫ ലോകകപ്പിന് മുന്നോടിയായി ടിക്കറ്റ് വിൽപ്പനയുമായി ബന്ധപ്പെട്ട് വലിയ വിവാദങ്ങളാണ് ഉയരുന്നത്. അമേരിക്കയിലെ ഈസ്റ്റ് റൂഥർഫോർഡിലുള്ള മെറ്റ്ലൈഫ് സ്റ്റേഡിയത്തിൽ നടക്കാനിരിക്കുന്ന മത്സരങ്ങൾ, പ്രത്യേകിച്ച് ജൂലൈ 19-ലെ ഫൈനൽ എന്നിവയ്ക്കുള്ള ടിക്കറ്റ് നടപടിക്രമങ്ങളെക്കുറിച്ച് ന്യൂയോർക്ക്, ന്യൂജേഴ്സി അറ്റോർണി ജനറൽമാർ സംയുക്ത അന്വേഷണം പ്രഖ്യാപിച്ചു. ഇതുമായി ബന്ധപ്പെട്ട് ഫിഫയ്ക്ക് ഔദ്യോഗികമായി സമൻസ് അയച്ചിട്ടുണ്ട്. ടിക്കറ്റ് വിൽപനയിലെ സുതാര്യത, വിലനിർണ്ണയ രീതികൾ, സീറ്റ് വിഹിതം എന്നിവയെക്കുറിച്ചുള്ള ആഭ്യന്തര രേഖകളാണ് അധികൃതർ പരിശോധിക്കുന്നത്.
ടിക്കറ്റ് വിലയിലുണ്ടായ അമിതമായ വർദ്ധനവാണ് അന്വേഷണത്തിന്റെ പ്രധാന കാരണം. 2025 ഒക്ടോബറിനും 2026 ഏപ്രിലിനും ഇടയിൽ ടിക്കറ്റ് നിരക്കുകളിൽ ശരാശരി 34 ശതമാനം വർദ്ധനവാണ് ഫിഫ വരുത്തിയത്. ഫൈനൽ മത്സരത്തിന്റെ ടിക്കറ്റ് വില 32,970 ഡോളർ വരെ ഉയരുകയും, ഏറ്റവും കുറഞ്ഞ നോൺ-ഹോസ്പിറ്റാലിറ്റി ടിക്കറ്റുകൾക്ക് പോലും 6,730 ഡോളർ ഈടാക്കുകയും ചെയ്തത് ആരാധകർക്കിടയിൽ വലിയ പ്രതിഷേധത്തിന് കാരണമായി. ഇതിനുപുറമെ, തെറ്റിദ്ധരിപ്പിക്കുന്ന സീറ്റ് മാപ്പുകൾ ഉപയോഗിച്ച് ടിക്കറ്റുകൾ വിറ്റതായും, ആരാധകർക്ക് അവർ തിരഞ്ഞെടുത്ത സീറ്റുകൾ ലഭിച്ചില്ലെന്നുമുള്ള പരാതികളും അന്വേഷണ പരിധിയിലുണ്ട്.
ലോകകപ്പ് ചരിത്രത്തിൽ ആദ്യമായാണ് ഫിഫ ‘ഡൈനാമിക് പ്രൈസിംഗ്’ സംവിധാനം നടപ്പിലാക്കുന്നത്. ആവശ്യാനുസരണം തത്സമയം വിലകൾ മാറ്റാൻ കഴിയുന്ന ഈ രീതി ആരാധകർക്ക് കനത്ത സാമ്പത്തിക ബാധ്യത വരുത്തിവെക്കുന്നുവെന്ന് നേരത്തെ തന്നെ വിമർശനങ്ങൾ ഉയർന്നിരുന്നു. ഇതേത്തുടർന്ന് പ്രതിഷേധം തണുപ്പിക്കാൻ 60 ഡോളറിന്റെ കുറഞ്ഞ നിരക്കിലുള്ള ടിക്കറ്റുകൾ പ്രഖ്യാപിച്ചെങ്കിലും അവയുടെ ലഭ്യത വളരെ പരിമിതമായിരുന്നു. ടിക്കറ്റ് വിൽപ്പനയിലെ ഇത്തരം ക്രമക്കേടുകൾ ലോകകപ്പിന്റെ മാറ്റ് കുറയ്ക്കുന്നുവെന്ന ആരോപണം ശക്തമാകുമ്പോഴാണ് നിയമനടപടികളുമായി അധികൃതർ രംഗത്തെത്തിയിരിക്കുന്നത്.