ചെറുകിട മില്ലുകൾക്ക് പ്രതിസന്ധിയിൽ; വെളിച്ചെണ്ണയുടെയും കൊപ്രയുടെയും വില ഉയരുന്നു

തൃശൂർ: വെളിച്ചെണ്ണയുടെയും കൊപ്രയുടെയും വില കുത്തനെ ഉയർന്നിരുന്നു. ഇതോടെ സംസ്ഥാനത്തെ ചെറുകിട മില്ലുകൾ കടുത്ത പ്രതിസന്ധിയിലാണ്. നാട്ടിൽ നിന്ന് തന്നെ കൊപ്ര വാങ്ങി സ്വന്തം മില്ലിൽ വെളിച്ചെണ്ണ നിർമിച്ച് വിൽക്കുന്നവർക്ക് പിടിച്ചുനിൽക്കാനാകാത്ത അവസ്ഥയാണ്. ദിവസം ശരാശരി 3000 രൂപയുടെ വരെ കച്ചവടം നടന്നിരുന്ന മില്ലുകളിൽ നിലവിൽ 500 രൂപയ്ക്ക് പോലും കച്ചവടമില്ലെന്ന് മില്ലുടമകൾ പറയുന്നു.

അവർക്ക് പൊതു മാർക്കറ്റിലെ മൊത്തവിലയുടെ നിലവാരത്തിൽ വിൽക്കാൻ സാധിക്കില്ല. ഉദാഹരണത്തിന്, തൃശൂരിൽ മാർക്കറ്റ് വില കിലോഗ്രാമിന് 303 രൂപയുള്ളപ്പോൾ, 350 മുതൽ 370 രൂപ വരെയാണ് ‘ആട്ടിയ വെളിച്ചെണ്ണ’ എന്ന പേരിൽ ചെറുകിട മില്ലുകൾ ഉൽപാദിപ്പിക്കുന്ന വെളിച്ചെണ്ണയ്ക്ക്. 100 കിലോ തേങ്ങ വാങ്ങി ഉണക്കി കൊപ്രയാക്കിയാൽ 30 കിലോ മാത്രമാണ് ലഭിക്കുക. ഇനി കൊപ്ര നേരിട്ട് വാങ്ങിയാൽ കിലോയ്ക്ക് 210 മുതൽ 215 രൂപ വരെ നാട്ടിൽ നൽകണം. ഇത് ആട്ടി എണ്ണയെടുക്കുമ്പോൾ ശരാശരി 65% വരെ എണ്ണ ലഭിക്കുമെന്നാണ് കണക്കെങ്കിലും നിലവിൽ 62% വരെയേ ലഭിക്കുന്നുള്ളൂ എന്ന് മില്ലുകാർ പറയുന്നു.

എണ്ണയാട്ടുമ്പോൾ ലഭിക്കുന്ന തേങ്ങാപ്പിണ്ണാക്കിൽ നിന്നുള്ള വരുമാനം ഉപയോഗിച്ച് വൈദ്യുതി ചാർജും പണിക്കൂലിയും നേരിടാനാകും. അത് ഒഴിവാക്കിയാൽ പോലും 345 രൂപ വരെ ഒരു കിലോ എണ്ണ ഉൽപാദിപ്പിക്കാൻ ചെലവാകും. ഈ രീതിയിൽ, മാർക്കറ്റ് വിലയിൽ നിന്ന് എപ്പോഴും 50 രൂപയെങ്കിലും ഉയർന്നുനിൽക്കും ചെറുകിട മില്ലുകാരുടെ എണ്ണയ്ക്ക്.