കുറ്റ്യാടിയിൽ ഒമ്പത് ദിവസം മാത്രം പ്രായമായ കുഞ്ഞ് മരിച്ചു; അസ്വാഭാവിക മരണത്തിന് കേസെടുത്ത് പോലീസ്

കോഴിക്കോട്: കുറ്റ്യാടിയിൽ ഒമ്പത് ദിവസം മാത്രം പ്രായമായ കുഞ്ഞ് മരിച്ചു. കക്കട്ടിൽ മണിയൂർ സ്വദേശികളായ ഹിരൺ-ചാരുഷ ദമ്പതികളുടെ കുഞ്ഞാണ് മരിച്ചത്. കുഞ്ഞിന് ആരോഗ്യപ്രശ്നങ്ങളുണ്ടായിരുന്നെന്നും വീട്ടിൽ വെച്ച് മരുന്ന് നൽകിയ ശേഷം ശ്വാസംമുട്ടൽ അനുഭവപ്പെട്ടെന്നുമാണ് പ്രാഥമിക വിവരം. സംഭവത്തിൽ അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചതായി പോലീസ് അറിയിച്ചു.

മരുന്ന് നൽകിയതിന് പിന്നാലെ കുഞ്ഞിന് ശ്വാസം കിട്ടാൻ പ്രയാസം നേരിട്ടതിനെ തുടർന്ന് ഉടൻ തന്നെ ആശുപത്രിയിലേക്ക് കൊണ്ടുപോവുകയായിരുന്നു. എന്നാൽ, ആശുപത്രിയിൽ എത്തും മുമ്പ് കുഞ്ഞ് മരിച്ചു. പോസ്റ്റ്മോർട്ടം റിപ്പോർട്ട് ലഭിച്ചാൽ മാത്രമേ മരണകാരണം സംബന്ധിച്ച് വ്യക്തമായ വിവരം ലഭിക്കൂ. കുഞ്ഞിന് നൽകിയത് ഏത് മരുന്നാണ്, അത് ഡോക്ടറുടെ നിർദ്ദേശപ്രകാരമാണോ നൽകിയത് തുടങ്ങിയ കാര്യങ്ങൾ പോലീസ് പരിശോധിക്കുന്നുണ്ട്.