മുംബൈ: ടാറ്റ സൺസിനെ ഓഹരി വിപണിയിൽ പട്ടികയിൽപ്പെടുത്തണമെന്ന റിസർവ് ബാങ്കിന്റെ നിർദേശത്തിന് പിന്നാലെ നിർണായക നീക്കവുമായി ടാറ്റ ട്രസ്റ്റ്സ്. നിലവിലെ രീതിയിൽ പട്ടികയിൽപ്പെടുത്തുന്നതിന് പകരം, ടാറ്റ സൺസിനെ ബാങ്കിതര ധനകാര്യ കമ്പനിയോ കോർ നിക്ഷേപ കമ്പനിയോ അല്ലാത്ത രീതിയിൽ പുനഃസംഘടിപ്പിക്കാനുള്ള പദ്ധതിയാണ് ട്രസ്റ്റ്സ് മുന്നോട്ടുവച്ചിരിക്കുന്നത്. ഇതോടെ കമ്പനിയുടെ നിലവിലെ ഘടനയിലും സ്വഭാവത്തിലും വലിയ മാറ്റം വന്നേക്കും.
ടാറ്റ ഇലക്ട്രോണിക്സ് സിസ്റ്റംസ് സൊല്യൂഷൻസ് പ്രൈവറ്റ് ലിമിറ്റഡിനെയും ടാറ്റ കൺസൾട്ടിങ് എൻജിനീയേഴ്സിനെയും ടാറ്റ സൺസ് പ്രൈവറ്റ് ലിമിറ്റഡുമായി ലയിപ്പിക്കാനാണ് നിർദേശം. ലയനവും പുനഃസംഘടനയും നടപ്പായാൽ, റിസർവ് ബാങ്കിന്റെ പട്ടികയിൽപ്പെടുത്തൽ നിർദേശത്തിന് കാരണമായ നിലവിലെ നിയന്ത്രണ ചട്ടക്കൂടിന് പുറത്തേക്ക് ടാറ്റ സൺസിനെ എത്തിക്കാനാകുമെന്നാണ് കണക്കാക്കുന്നത്. ഇതിനായി ആവശ്യമായ അനുമതികൾ നേടാനുള്ള നടപടികൾ സ്വീകരിക്കണമെന്നും ടാറ്റ സൺസ് ബോർഡ് നിർദേശം പരിഗണിച്ച് അംഗീകരിക്കണമെന്നും ടാറ്റ ട്രസ്റ്റ്സ് ആവശ്യപ്പെട്ടിട്ടുണ്ട്.
നിലവിലെ രൂപത്തിൽ പട്ടികയിൽപ്പെടുത്തൽ ഒഴിവാക്കാനുള്ള ശ്രമമായാണ് ഈ നീക്കം വിലയിരുത്തപ്പെടുന്നത്. നേരത്തെ ടാറ്റ സൺസിന്റെ ഉന്നതതല ബാങ്കിതര ധനകാര്യ കമ്പനി എന്ന രജിസ്ട്രേഷൻ റദ്ദാക്കണമെന്ന ആവശ്യം റിസർവ് ബാങ്ക് തള്ളിയിരുന്നു. ഇതിന് പിന്നാലെയാണ് ഓഹരി വിപണിയിൽ പട്ടികയിൽപ്പെടുത്തണമെന്ന നിലയിലേക്ക് കമ്പനി എത്തിയത്. ടാറ്റ സൺസിന്റെ 66 ശതമാനം ഓഹരികളും കൈവശം വച്ചിരിക്കുന്നത് ടാറ്റ ട്രസ്റ്റ്സാണ്. എന്നാൽ പുനഃസംഘടന സംബന്ധിച്ച നിർദേശം നിലവിൽ ടാറ്റ സൺസ് ബോർഡിന്റെ പരിഗണനയിലാണ്. റിസർവ് ബാങ്കിന്റെ അനുമതിയും ആവശ്യമാണ്.
സെപ്റ്റംബർ 17ന് ടാറ്റ സൺസ് എക്സിക്യൂട്ടീവ് ചെയർമാൻ എൻ. ചന്ദ്രശേഖരന്റെ കാലാവധി അഞ്ച് വർഷത്തേക്ക് കൂടി നീട്ടാൻ ബോർഡ് അനുമതി നൽകിയിരുന്നു. ഇതോടൊപ്പം റിസർവ് ബാങ്കിന്റെ മാനദണ്ഡങ്ങൾ പാലിക്കുന്നതിനായി ഓഹരി വിപണിയിൽ പട്ടികയിൽപ്പെടുത്താനുള്ള തീരുമാനവും ബോർഡ് എടുത്തിരുന്നു. ഇപ്പോൾ മുന്നോട്ടുവച്ചിരിക്കുന്ന പുനഃസംഘടനാ നിർദേശം അംഗീകരിക്കപ്പെടുകയും നടപ്പാക്കപ്പെടുകയും ചെയ്താൽ, ടാറ്റ സൺസിന്റെ ഭാവി ഘടനയിൽ തന്നെ വലിയ മാറ്റത്തിനാണ് വഴിയൊരുങ്ങുക.