ഗൂഗിളിന്റെ എഐ അസിസ്റ്റന്റ് ഇക്കോസിസ്റ്റം കൂടുതൽ വിപുലമാക്കാനൊരുങ്ങി ഗൂഗിൾ. ജനപ്രിയ വീഡിയോ-ഇമേജ് എഡിറ്റിംഗ് പ്ലാറ്റ്ഫോമായ ക്യാപ്കട്ടുമായി (CapCut) ജെമിനി ആപ്പ് കൈകോർക്കുന്നു. ഈ പങ്കാളിത്തത്തിലൂടെ ജെമിനി ആപ്പിനുള്ളിൽ തന്നെ ഫോട്ടോകളും വീഡിയോകളും എഡിറ്റ് ചെയ്യാൻ ഉപയോക്താക്കൾക്ക് അവസരം ലഭിക്കും. സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് ക്യാപ്കട്ട് ഔദ്യോഗികമായി ഈ സഹകരണം പ്രഖ്യാപിച്ചത്.
ഈ പുതിയ ഇൻറഗ്രേഷൻ വഴി ജെമിനി ഉപയോക്താക്കൾക്ക് ക്യാപ്കട്ടിന്റെ നൂതനമായ ക്രിയേറ്റീവ് ടൂളുകൾ എളുപ്പത്തിൽ ആക്സസ് ചെയ്യാനാകും. എഐ അധിഷ്ഠിത സംഭാഷണ ഇന്റർഫേസിനുള്ളിൽ തന്നെ കണ്ടന്റ് ക്രിയേഷൻ കൂടുതൽ ലളിതവും വേഗത്തിലുമാക്കാൻ ഈ സംവിധാനം സഹായിക്കും. ചിത്രങ്ങൾ സൃഷ്ടിക്കാനും മെച്ചപ്പെടുത്താനും വീഡിയോകൾ എഡിറ്റ് ചെയ്യാനും ജെമിനി വഴി സാധിക്കും. ഓട്ടോമാറ്റിക് വീഡിയോ എഡിറ്റിംഗ്, എഐ ഇമേജ് ജനറേഷൻ, റെഡി-മെയ്ഡ് ടെംപ്ലേറ്റുകൾ, ദൃശ്യ എഫക്റ്റുകൾ തുടങ്ങി ക്യാപ്കട്ടിന്റെ മികച്ച എഐ ടൂളുകളെല്ലാം ഇനി ജെമിനിയിൽ ലഭ്യമാകും.
ഇതൊരു പുതിയ ബന്ധമല്ല; കഴിഞ്ഞ വർഷാവസാനം ഗൂഗിൾ ഫോട്ടോസിൽ ‘എഡിറ്റ് വിത്ത് ക്യാപ്കട്ട്’ എന്ന ഷോർട്ട്കട്ട് അവതരിപ്പിച്ചിരുന്നു. ഗൂഗിൾ ഫോട്ടോസിൽ നിന്നുള്ള ചിത്രങ്ങൾ നേരിട്ട് ക്യാപ്കട്ടിലേക്ക് എക്സ്പോർട്ട് ചെയ്യാൻ ഇത് ഉപയോക്താക്കളെ സഹായിച്ചിരുന്നു. പുതിയ ജെമിനി ഇൻറഗ്രേഷൻ ഈ ബന്ധത്തെ കൂടുതൽ ശക്തമാക്കുകയും, ഒരു ആപ്പിൽ നിന്ന് മറ്റൊന്നിലേക്ക് മാറാതെ തന്നെ കണ്ടന്റ് നിർമ്മാണം സാധ്യമാക്കുന്ന സമഗ്രമായൊരു ക്രിയേറ്റീവ് പ്ലാറ്റ്ഫോമായി ജെമിനിയെ മാറ്റുകയും ചെയ്യുന്നു.
ഈ ഫീച്ചർ എപ്പോൾ ലഭ്യമാകുമെന്നതിനെക്കുറിച്ചുള്ള ഔദ്യോഗിക തീയതി ഗൂഗിളോ ക്യാപ്കട്ടോ ഇതുവരെ പുറത്തുവിട്ടിട്ടില്ല. കൂടാതെ, ഈ ടൂളുകൾ പൂർണ്ണമായി ഉപയോഗിക്കാൻ സബ്സ്ക്രിപ്ഷൻ ആവശ്യമായി വരുമോ എന്ന കാര്യത്തിലും വ്യക്തതയില്ല. എങ്കിലും, സംഭാഷണ അധിഷ്ഠിത എഐ പ്ലാറ്റ്ഫോമുകൾ ക്രിയേറ്റീവ് എഡിറ്റിംഗ് ടൂളുകളുമായി ഒന്നിക്കുന്ന പുതിയ ട്രെൻഡിലേക്ക് ജെമിനിയെ എത്തിക്കാൻ ഈ നീക്കം സഹായിക്കും. എഐ അധിഷ്ഠിത കണ്ടന്റ് ക്രിയേഷൻ മേഖലയിൽ കൂടുതൽ ആധിപത്യം ഉറപ്പിക്കാനാണ് ഗൂഗിളിന്റെ ഈ ശ്രമം.