Home » Blog » kerala Max » ഇസാഫ് ബാങ്കിൽ വിജിലൻസ് വാരാഘോഷം
9

ഇസാഫ് ഹെഡ് ഓഫീസിൽ നടന്ന വിജിലൻസ് വാരാഘോഷ സമാപനം ഇസാഫ് ബാങ്ക് എംഡിയും സിഇഒയുമായ ഡോ. കെ പോൾ തോമസ് ഉദ്‌ഘാടനം ചെയ്യുന്നു. എക്സിക്യൂട്ടീവ് ഡയറക്ടർ ജോർജ് കെ ജോൺ, എക്സിക്യൂട്ടീവ് വൈസ് പ്രസിഡന്റുമാരായ ബോസ്കോ ജോസഫ്, ഗിരീഷ് സി പി, ചീഫ് റിസ്ക് ഓഫീസർ നരസിംഹ മൂർത്തി ഗുഡിമേത്തല, ചീഫ് വിജിലൻസ് ഓഫീസർ എം സി പോൾ, ഇസാഫ് ഫൗണ്ടേഷൻ ഡയറക്ടർ ഡോ. ജേക്കബ് സാമുവേൽ, ഇസാഫ് കോപ്പറേറ്റീവ് ചെയർപേഴ്സൺ സലീന ജോർജ് എന്നിവർ സമീപം.

തൃശൂർ: സുതാര്യവും നീതിയുക്തവുമായ ബാങ്കിങ് പ്രവർത്തനങ്ങൾ ശക്തിപ്പെടുത്തുന്നതിന്റെ ഭാഗമായി ഇസാഫ് സ്മോൾ ഫിനാൻസ് ബാങ്കിൽ വിജിലൻസ് വാരാഘോഷം സംഘടിപ്പിച്ചു. പൊതുജനവിശ്വാസം ആർജിച്ച് സുസ്ഥിര വളർച്ച കൈവരിക്കുന്നതിന് സത്യസന്ധതയും ഉത്തരവാദിത്തബോധവും അനിവാര്യമാണെന്ന സന്ദേശം മുൻനിർത്തിയാണ് വാരാഘോഷം സംഘടിപ്പിച്ചത്. ‘സത്യസന്ധതയിലൂടെ സമൃദ്ധി’ എന്നതാണ് ഇത്തവണത്തെ പ്രമേയം. രാജ്യത്തുടനീളമുള്ള ഇസാഫ് ബാങ്ക് ശാഖകളിലെ ജീവനക്കാർക്കായി ദേശീയതല ക്വിസ് മത്സരവും സംഘടിപ്പിച്ചു. വിജിലൻസ്, ധാർമികത, നിയമങ്ങളും ചട്ടങ്ങളും പാലിക്കൽ, സൈബർ സുരക്ഷ തുടങ്ങിയ വിഷയങ്ങളിലായിരുന്നു മത്സരം. സുരക്ഷിത ബാങ്കിങ് രീതികളും സാമ്പത്തിക തട്ടിപ്പുകൾ തടയുന്നതിനുള്ള മാർഗങ്ങളും പരിചയപ്പെടുത്തുന്നതിനായി ‘സമ്പർക്കം’ വിജിലൻസ് ബോധവത്കരണ ക്യാംപെയ്‌നും നടത്തി.
ഇസാഫ് ഹെഡ് ഓഫീസിൽ നടന്ന സമാപനച്ചടങ്ങ് ഇസാഫ് ബാങ്ക് എംഡിയും സിഇഒയുമായ ഡോ. കെ. പോൾ തോമസ് ഉദ്ഘാടനം ചെയ്തു. വിജിലൻസ് ഡയറക്ടർ മനോജ് എബ്രഹാം ഐപിഎസ് മുഖ്യസന്ദേശം നൽകി. ഇസാഫ് ബാങ്ക് എക്സിക്യുട്ടീവ് ഡയറക്ടർ ജോർജ് കെ ജോൺ, മുതിർന്ന ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു. സുതാര്യവും അഴിമതിമുക്തവുമായ തൊഴിൽ അന്തരീക്ഷം ഒരുക്കുന്നതിന് സ്ഥാപനങ്ങളിൽ ഇത്തരത്തിലുള്ള വിജിലൻസ് ബോധവൽക്കരണ പരിപാടികൾ സംഘടിപ്പിക്കണമെന്ന് മനോജ് എബ്രഹാം ഐപിഎസ് പറഞ്ഞു. ദേശീയതല ക്വിസ് മത്സരത്തിലെ വിജയികളെ ചടങ്ങിൽ ആദരിച്ചു. ബാങ്കിന്റെ താൽപര്യങ്ങൾ സംരക്ഷിക്കുന്നതിൽ ജാഗ്രതയും സത്യസന്ധതയും പ്രതിബദ്ധതയും കാഴ്ചവെച്ച ജീവനക്കാർക്ക് വിജിലന്റ് വാരിയർ അവാർഡും സമ്മാനിച്ചു.

Leave a Reply

Your email address will not be published. Required fields are marked *