ആരാധകർക്ക് നിരാശ; കൽക്കി രണ്ടാം ഭാഗത്തിൽ ദീപികയില്ല! പകരം ആര്?

അമിതാഭ് ബച്ചന്‍, കമല്‍ ഹാസന്‍, ദീപിക പദുകോണ്‍, പ്രഭാസ്, ദുൽഖർ സൽമാൻ ദിഷ പഠാനി, ശാശ്വത ചാറ്റര്‍ജി, ബ്രഹ്മാനന്ദം, രാജേന്ദ്ര പ്രസാദ്, ശോഭന, പശുപതി, അന്ന ബെന്‍ തുടങ്ങി വന്‍ താരനിരയിൽ കഴിഞ്ഞ വർഷം പുറത്തിറങ്ങിയ ഏറ്റവും വലിയ വിജയമായ ചിത്രങ്ങളിൽ ഒന്നായിരുന്നു ‘കൽക്കി 2898 എഡി.’ മഹാഭാരതത്തെ ആസ്പദമാക്കിയൊരുക്കിയ എപിക് സയന്‍സ് ഫിക്ഷന്‍ വിഭാഗത്തില്‍പെടുന്ന ചിത്രം നാഗ് അശ്വിനാണ് രചനയും സംവിധാനവും നിര്‍വ്വഹിച്ചത്. 600 കോടി മുതൽമുടക്കിൽ നിർമ്മിച്ച ചിത്രം 1200 കോടിയാണ് ആഗോള ബോക്സ്ഓഫീസിൽ നിന്നും സ്വന്തമാക്കിയത്.

ഇപ്പോഴിതാ കൽക്കിയുടെ രണ്ടാം ഭാഗത്തിൽ ദീപിക പദുകോൺ ഉണ്ടാവില്ലെന്നാണ് നിർമ്മാതാക്കളായ വൈജയന്തി മൂവീസ് അറിയിച്ചിരിക്കുന്നത്. കൽക്കി പോലെയൊരു സിനിമ വലിയ രീതിയിലുള്ള കമ്മിറ്റ്മെന്റ് അർഹിക്കുന്നുണ്ടെന്നും, ഇരുവരും തമ്മിൽ നടത്തിയ ചർച്ചകൾക്ക് ശേഷമാണ് ഇക്കാര്യം ആരാധകരോട് പങ്കുവെക്കുന്നതെന്നുമാണ് നിർമ്മാതാക്കൾ അറിയിച്ചത്. സുമതി എന്ന സുപ്രധാനമായ കഥാപാത്രമായിരുന്നു ചിത്രത്തിൽ ദീപിക അവതരിപ്പിച്ചിരുന്നത്. അതുകൊണ്ട് തന്നെ ദീപികയ്ക്ക് പകരമായി ആരാ ഇനി എത്തുന്നതെന്ന് ചർച്ചകളാണ് സമൂഹ മാധ്യമങ്ങളിലടക്കം നടന്നുകൊണ്ടിരിക്കുന്നത്.