കേരളത്തിലെ ഇരുചക്ര വാഹനയാത്രക്കാർ ഹെൽമറ്റ് ധരിക്കാത്തതിനെതിരെ കർശന നടപടിയുമായി കേരള പൊലീസ്. ഒരാഴ്ച നീണ്ടുനിന്ന പ്രത്യേക പരിശോധനയിലൂടെ മാത്രം 2.7 കോടിയിലധികം രൂപയാണ് പിഴയായി ഈടാക്കിയത്. ‘ഹെൽമറ്റ് ഓൺ – സേഫ് റൈഡ്’ എന്ന പേരിൽ നടന്ന ഈ സ്പെഷ്യൽ ഡ്രൈവിൽ 51,604 നിയമലംഘനങ്ങളാണ് സംസ്ഥാനത്തുടനീളം കണ്ടെത്തിയത്. റോഡപകടങ്ങൾ വർധിക്കുന്ന സാഹചര്യത്തിൽ ജനങ്ങളെ ബോധവൽക്കരിക്കാനും അപകടമരണങ്ങൾ കുറയ്ക്കാനുമായാണ് ട്രാഫിക് ആൻഡ് റോഡ് സേഫ്റ്റി മാനേജ്മെന്റ് വിഭാഗം ഈ പരിശോധന സംഘടിപ്പിച്ചത്.
സംസ്ഥാന വ്യാപകമായി 1,13,011 ഇരുചക്ര വാഹനങ്ങളാണ് ഈ കാലയളവിൽ പരിശോധനയ്ക്ക് വിധേയമാക്കിയത്. മാർച്ച് 18 മുതൽ 24 വരെ നടന്ന പരിശോധനയിൽ കൃത്യമായി പറഞ്ഞാൽ 2,70,51,150 രൂപയാണ് ഖജനാവിലേക്ക് എത്തിയത്. ട്രാഫിക് സോണൽ എസ്.പിമാരുടെ മേൽനോട്ടത്തിൽ ജില്ലാ ട്രാഫിക് നോഡൽ ഓഫീസർമാരുമായി സഹകരിച്ചാണ് ഈ കർശന നടപടി നടപ്പിലാക്കിയത്. വരും ദിവസങ്ങളിലും ഹൈവേ പട്രോളിംഗ് വിഭാഗം പരിശോധന തുടരുമെന്നും നിയമലംഘനങ്ങൾ ആവർത്തിക്കുന്നവർക്കെതിരെ ലൈസൻസ് റദ്ദാക്കുന്നത് ഉൾപ്പെടെയുള്ള കഠിനമായ ശിക്ഷാ നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.
പൊതുജനങ്ങൾക്ക് ട്രാഫിക് നിയമലംഘനങ്ങൾ ശ്രദ്ധയിൽപ്പെട്ടാൽ അത് അറിയിക്കാനുള്ള സംവിധാനവും പൊലീസ് ഒരുക്കിയിട്ടുണ്ട്. ‘ശുഭയാത്ര’ എന്ന പേരിലുള്ള 974700 1099 എന്ന വാട്ട്സ്ആപ്പ് നമ്പറിലൂടെ ഇത്തരം വിവരങ്ങൾ ട്രാഫിക് മാനേജ്മെന്റ് വിഭാഗത്തെ അറിയിക്കാം. സ്വന്തം ജീവന്റെ സുരക്ഷയ്ക്കും നിയമനടപടികൾ ഒഴിവാക്കാനും ഹെൽമറ്റ് ധരിക്കണമെന്ന് പൊലീസ് ആവർത്തിച്ച് നിർദ്ദേശിക്കുന്നു.