‘സുമതി വളവ്’ സിനിമയെപ്പറ്റിയുള്ള വിവാദങ്ങളിൽ പ്രതികരിച്ച് ബി. ഉണ്ണികൃഷ്ണൻ. ചിത്രത്തിന്റെ ചെലവ് കണക്ക് വിശദമായി ബോധിപ്പിച്ചിട്ടുണ്ടെന്ന് അദ്ദേഹം വ്യക്തമാക്കി. നിർമാതാവ് മുരളി കുന്നുംപുറം നടത്തിയ തുറന്ന പ്രതികരണത്തിന് പിന്നാലെയാണ് വിഷയത്തിൽ വിവാദം ശക്തമായത്.
ഫെഫ്ക ജനറൽ സെക്രട്ടറി കൂടിയായ ഉണ്ണികൃഷ്ണൻ, പ്രൊഡ്യൂസേഴ്സ് അസോസിയേഷനുമായി സംസാരിച്ചുവെന്നും അവരുടെ അംഗങ്ങൾ ചെലവ് കണക്ക് നൽകിയിട്ടുണ്ടെന്നും പറഞ്ഞു. “വൈകാരികമായ അന്തരീക്ഷത്തിൽ അഭിപ്രായം പറയുന്നതിൽ സാരമില്ലാത്തതിനാൽ കൂടുതൽ പ്രതികരിക്കുന്നില്ല” എന്നും അദ്ദേഹം കൂട്ടിച്ചേർത്തു.
അതേസമയം, സിനിമ സംവിധാനം ചെയ്തത് ഒരു നടനാണെന്ന തരത്തിലുള്ള പ്രചാരണങ്ങൾ മോശമാണെന്നും അദ്ദേഹം വിമർശിച്ചു. ഉണ്ണി മുകുന്ദൻ ‘മാളികപ്പുറം’ സിനിമ സംവിധാനം ചെയ്തുവെന്ന ആരോപണങ്ങളെയും അദ്ദേഹം തള്ളി.
“സിനിമ സംവിധാനം ചെയ്യുന്നത് സംവിധായകനും സാങ്കേതിക സംഘവുമാണ്. നടന്മാർ അവരുടെ ജോലിയാണ് ചെയ്യേണ്ടത്. മലയാള സിനിമയിൽ ആരും ‘ഗോസ്റ്റ് ഡയറക്ഷൻ’ ശ്രമിച്ചിട്ടില്ല, അങ്ങനെ ശ്രമിച്ചാൽ അത് നടക്കുന്നതുമല്ല,” എന്നും അദ്ദേഹം വ്യക്തമാക്കി.