റെക്കോർഡ് വിലയിൽ നിന്ന് സ്വർണവില ഇടിഞ്ഞു തുടങ്ങിയതോടെ, കൈവശമുള്ള പഴയ സ്വർണാഭരണങ്ങൾ വിറ്റഴിക്കാൻ ജനങ്ങൾ വലിയ താൽപ്പര്യം കാണിക്കുന്നു. വരും ദിവസങ്ങളിൽ വില വീണ്ടും കുറഞ്ഞാൽ തങ്ങളുടെ കൈവശമുള്ള സ്വർണ്ണത്തിന്റെ മൂല്യം ഇടിയുമെന്ന ആശങ്കയാണ് ഇത്തരമൊരു തീരുമാനത്തിലേക്ക് ആളുകളെ എത്തിക്കുന്നത്. ഇന്ത്യ ബുള്ളിയൻ ആൻഡ് ജ്വല്ലേഴ്സ് അസോസിയേഷൻ പുറത്തുവിട്ട കണക്കുകൾ പ്രകാരം, കഴിഞ്ഞ ഏപ്രിൽ-ജൂൺ പാദത്തിൽ മാത്രം ഏകദേശം 50 ടൺ പഴയ സ്വർണ്ണമാണ് വിപണിയിൽ എത്തിയത്. ഇത് കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 43 മുതൽ 50 ശതമാനം വരെ കൂടുതലാണ്.
സ്വർണ്ണ വിപണിയിലെ ഡിമാൻഡ് കുറയുന്നു
സ്വർണ്ണത്തിന്റെ ഇറക്കുമതി തീരുവ കേന്ദ്രസർക്കാർ 6 ശതമാനത്തിൽ നിന്ന് 15 ശതമാനമായി കുത്തനെ ഉയർത്തിയത് വിപണിയെ സാരമായി ബാധിച്ചിട്ടുണ്ട്. തീരുവ വർദ്ധിപ്പിച്ചതിന് ശേഷം പുതിയ സ്വർണ്ണം വാങ്ങുന്നവരുടെ എണ്ണത്തിൽ 70 ശതമാനത്തിലധികം ഇടിവാണ് രേഖപ്പെടുത്തിയത്. പ്രധാനമന്ത്രി നരേന്ദ്ര മോദി ഒരു വർഷത്തേക്ക് സ്വർണ്ണം വാങ്ങുന്നത് മാറ്റിവെക്കാൻ ജനങ്ങളോട് അഭ്യർത്ഥിച്ച് രണ്ട് ദിവസത്തിന് ശേഷമായിരുന്നു ഈ നികുതി വർദ്ധനവ് നിലവിൽ വന്നത്. സ്വർണ്ണം വാങ്ങാൻ ഉദ്ദേശിക്കുന്നവർ വിപണിയിലെ സാഹചര്യങ്ങൾ വളരെ കരുതലോടെയാണ് നിരീക്ഷിക്കുന്നത്. വില ഇനിയും കുറയുമെന്ന പ്രതീക്ഷയിൽ സ്വർണ്ണപ്പണയങ്ങളുടെ എണ്ണത്തിലും വലിയ വർദ്ധനവുണ്ടായിട്ടുണ്ട്.
റെക്കോർഡ് വിലയിൽ നിന്ന് 30% ഇടിവ്
തുടർച്ചയായ നാലാമത്തെ ആഴ്ചയാണ് സ്വർണ്ണവിലയിൽ ഇടിവ് രേഖപ്പെടുത്തുന്നത്. ഓഗ്മോണ്ട് ഗോൾഡ് ഫോർ ഓൾ റിപ്പോർട്ട് പ്രകാരം, 2026 ജനുവരിയിൽ രേഖപ്പെടുത്തിയ റെക്കോർഡ് വിലയായ 5,597 ഡോളറിൽ നിന്ന് ഏകദേശം 30 ശതമാനത്തോളം ഇടിവാണ് സ്വർണ്ണത്തിന് ആഗോള വിപണിയിൽ ഉണ്ടായിട്ടുള്ളത്.