പോർച്ചുഗൽ-കോംഗോ മത്സരത്തിൽ റൊണാൾഡോ ഗ്രൗണ്ടിൽ ഒറ്റപ്പെട്ടുപോയെന്നും, ടീമിന്റെ തന്ത്രങ്ങൾ പാളിപ്പോയെന്നും ചൂണ്ടിക്കാട്ടി മുൻ ഇന്ത്യൻ താരം സി.കെ വിനീത് നടത്തിയ വിമർശനം ഫുട്ബോൾ ലോകത്ത് വലിയ ചർച്ചയാകുന്നു. പോർച്ചുഗൽ ടീം പ്രകടിപ്പിച്ച തെറ്റായ സമീപനമാണ് സമനിലയിലേക്ക് നയിച്ചതെന്ന് വിനീത് വ്യക്തമാക്കുന്നു.
കൂടുതൽ പാസുകൾ പൂർത്തിയാക്കുന്ന ടീം വിജയിക്കും എന്ന അബദ്ധധാരണയിലാണ് പോർച്ചുഗൽ താരങ്ങൾ മത്സരിച്ചതെന്ന് അദ്ദേഹം കുറ്റപ്പെടുത്തുന്നു. മധ്യനിരയിൽ വിറ്റിഞ്ഞയും ജോവോ നെവസും കഠിനാധ്വാനം ചെയ്തെങ്കിലും, അത് ടീമിന് ഗുണകരമായില്ല. പ്രധാന പ്ലേമേക്കർ ബ്രൂണോ ഫെർണാണ്ടസ് തന്റെ നിഴൽ മാത്രമായി ഒതുങ്ങിയപ്പോൾ, മികച്ച ഹെഡിങ് മികവുള്ള റൊണാൾഡോയ്ക്ക് വിങ്ങുകളിൽ നിന്ന് കൃത്യമായ ക്രോസുകളോ ത്രൂ ബോളുകളോ എത്തിക്കാൻ സഹതാരങ്ങൾ താല്പര്യം കാണിച്ചില്ല.
‘ഒറ്റയ്ക്കുണ്ടാക്കിയ സാമ്രാജ്യം’ എന്ന റൊണാൾഡോയെ വിശേഷിപ്പിക്കുന്ന വാചകം അന്വർത്ഥമാക്കുന്ന രീതിയിൽ അദ്ദേഹം ഗ്രൗണ്ടിൽ ഒറ്റപ്പെട്ടുപോയി. ആദ്യ പകുതിയിൽ ലക്ഷ്യബോധമുള്ള മുന്നേറ്റങ്ങൾ പോലും നടത്താൻ പോർച്ചുഗലിന് കഴിഞ്ഞില്ല എന്നത് ടീമിന്റെ തന്ത്രപരമായ പരാജയമാണ്. ഇതേ ശൈലി തുടരുകയാണെങ്കിൽ ഗ്രൂപ്പ് ഘട്ടം കടക്കുക പോർച്ചുഗലിന് കടുപ്പമായിരിക്കുമെന്നും അദ്ദേഹം ഓർമ്മിപ്പിച്ചു.