ഐ.പി.എൽ താരലേലത്തിന് മുന്നോടിയായി മുംബൈ ഇന്ത്യൻസ് നായകൻ ഹാർദിക് പാണ്ഡ്യ ചെന്നൈ സൂപ്പർ കിംഗ്സിലേക്ക് മാറുന്നുവെന്ന അഭ്യൂഹങ്ങൾ ശക്തമാകുന്നു. 2026 ഐ.പി.എൽ സീസണിന് ശേഷം തന്നെ ഹാർദിക് ടീം വിടുമെന്ന തരത്തിലുള്ള ചർച്ചകൾ സജീവമായിരുന്നു. കൊൽക്കത്ത നൈറ്റ് റൈഡേഴ്‌സും ചെന്നൈ സൂപ്പർ കിംഗ്സുമടക്കം നിരവധി ഫ്രാഞ്ചൈസികൾ താരത്തെ ടീമിലെത്തിക്കാൻ താൽപ്പര്യം പ്രകടിപ്പിച്ചിട്ടുണ്ടെങ്കിലും ചെന്നൈയാണ് നീക്കങ്ങളിൽ മുൻപന്തിയിലെന്നാണ് റിപ്പോർട്ടുകൾ.
മുംബൈ ഇന്ത്യൻസ് ഹാർദിക്കിനെ നിലനിർത്തുമോ എന്ന കാര്യത്തിൽ ഇതുവരെ വ്യക്തത വന്നിട്ടില്ല. നിലനിർത്തുന്ന താരങ്ങളുടെ പട്ടിക സമർപ്പിക്കാനുള്ള അവസാന തീയതി 2026 നവംബർ 15 ആണ്. അതിനുശേഷമേ താരത്തിന്റെ ഭാവി സംബന്ധിച്ച് കൂടുതൽ വിവരങ്ങൾ പുറത്തുവരൂ. ഡിസംബറിലാണ് ഐ.പി.എൽ താരലേലം നടക്കുന്നത്.
അതേസമയം, ഹാർദിക്കിന്റെ ഫിറ്റ്‌നസ് താരലേലത്തിലും ഇന്ത്യൻ ടീമിലെ ഭാവിയിലും നിർണ്ണായകമാകും. ന്യൂസിലാൻഡിനെതിരായ പരമ്പരയിൽ നിന്ന് ഒഴിവാക്കപ്പെട്ട ഹാർദിക്കിന്റെ കായികക്ഷമത ഇന്ത്യൻ പരിശീലകൻ ഗൗതം ഗംഭീർ സൂക്ഷ്മമായി നിരീക്ഷിച്ചുവരികയാണ്. പരിക്കുകൾ അലട്ടുന്ന സാഹചര്യം തുടർന്നാൽ ഏകദിന ലോകകപ്പ് സ്ക്വാഡിൽ ഇടംപിടിക്കുക ഹാർദിക്കിന് വെല്ലുവിളിയാകും.