മഴ ശക്തമായി തുടരുമ്പോഴും സംസ്ഥാനത്തെ വൈദ്യുതി ആവശ്യകതയിൽ കാര്യമായ കുറവില്ലെന്ന് കെഎസ്ഇബി. ഇതോടെ ഇന്നും വൈദ്യുതി നിയന്ത്രണം ഏർപ്പെടുത്തേണ്ട സാഹചര്യമുണ്ടാകുമെന്നാണ് ബോർഡിന്റെ മുന്നറിയിപ്പ്. ഏകദേശം 400 മുതൽ 500 മെഗാവാട്ടിന്റെ ലഭ്യതക്കുറവ് ഉണ്ടാകാൻ സാധ്യതയുള്ളതിനാൽ സംസ്ഥാനത്ത് ഭാഗിക വൈദ്യുതി നിയന്ത്രണം വേണ്ടിവന്നേക്കും.
രാജ്യത്താകമാനം വൈദ്യുതി ആവശ്യകത വലിയ തോതിൽ ഉയർന്നതാണ് നിലവിലെ പ്രതിസന്ധിക്ക് പ്രധാന കാരണം. പവർ എക്സ്ചേഞ്ച് വഴി ലഭിക്കുന്ന വൈദ്യുതിയുടെ ലഭ്യതയിലും ഇതുമൂലം കാര്യമായ കുറവുണ്ടായതായി കെഎസ്ഇബി അറിയിച്ചു. മഴയുള്ള സാഹചര്യത്തിലും വൈദ്യുതി ഉപയോഗത്തിൽ കാര്യമായ കുറവ് രേഖപ്പെടുത്താത്തതും സംസ്ഥാനത്തിന് അധിക സമ്മർദമാകുകയാണ്.
ഇതിനുപുറമെ, ദേശീയ തലത്തിൽ ഗ്രിഡ് കൺട്രോളർ ഓഫ് ഇന്ത്യ അറിയിച്ച 12,000 മെഗാവാട്ടിന്റെ കുറവും പൂർണമായി പരിഹരിക്കപ്പെട്ടിട്ടില്ല. ഇതോടെ ആവശ്യത്തിന് വൈദ്യുതി ലഭ്യമാക്കുന്നതിൽ സംസ്ഥാനത്തിന് വീണ്ടും പ്രതിസന്ധി നേരിടുകയാണ്. ലഭ്യതക്കുറവ് തുടർന്നാൽ ഉപഭോക്താക്കൾക്ക് ഭാഗിക നിയന്ത്രണം ഏർപ്പെടുത്തേണ്ടിവരുമെന്നാണ് കെഎസ്ഇബിയുടെ വിശദീകരണം.
വൈദ്യുതി നിയന്ത്രണം വേണ്ടിവരുന്ന സാഹചര്യമുണ്ടായാൽ ഇന്ന് വൈകിട്ട് 6.45 മുതൽ രാത്രി 12.45 വരെയുള്ള സമയത്തായിരിക്കും നിയന്ത്രണത്തിന് സാധ്യത. രാജ്യത്തെ ഉയർന്ന വൈദ്യുതി ആവശ്യകതയും പവർ എക്സ്ചേഞ്ചിലെ ലഭ്യതക്കുറവും ദേശീയ ഗ്രിഡിലെ കുറവും ഒരുമിച്ച് തുടരുന്നതാണ് കേരളത്തിലും നിയന്ത്രണ സാധ്യത ഉയർത്തുന്നത്.