ഇന്ത്യയിലെ ആദ്യത്തെ അതിവേഗ റെയിൽ ഇടനാഴിയായ മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിയിൽ നിർണായക നാഴികക്കല്ല് കൂടി പിന്നിട്ടു. മഹാരാഷ്ട്രയിലെ പാൽഘർ ജില്ലയിലുള്ള ദഹാനു താലൂക്കിൽ, കേവലം അഞ്ച് മാസത്തിനുള്ളിലെ മൂന്നാമത്തെ പർവ്വത തുരങ്കത്തിന്റെ നിർമ്മാണം വിജയകരമായി പൂർത്തിയാക്കി. കേന്ദ്ര റെയിൽവേ മന്ത്രി അശ്വിനി വൈഷ്ണവാണ് ഈ സന്തോഷവാർത്ത ഔദ്യോഗികമായി പങ്കുവെച്ചത്. 2017 സെപ്റ്റംബറിൽ തറക്കല്ലിട്ട ഈ 508 കിലോമീറ്റർ നീളമുള്ള പദ്ധതിയുടെ നിർമ്മാണ പ്രവർത്തനങ്ങൾ ഇപ്പോൾ അതിവേഗത്തിലാണ് പുരോഗമിക്കുന്നത്. നിലവിൽ ഇരു സംസ്ഥാനങ്ങളിലും വമ്പൻ ഫ്ലൈഓവറുകൾ ഉയരുന്നതിനൊപ്പം മുംബൈയ്ക്ക് സമീപം കടലിനടിയിലൂടെയുള്ള തുരങ്ക നിർമ്മാണവും ആരംഭിച്ചിട്ടുണ്ട്. 2027 ഓടെ ഇന്ത്യയുടെ ആദ്യത്തെ തദ്ദേശീയ അതിവേഗ ട്രെയിൻ സെറ്റ് പുറത്തിറങ്ങുമെന്നാണ് പ്രതീക്ഷിക്കുന്നത്.
അഹമ്മദാബാദിലെ ഏറ്റവും തിരക്കേറിയ കാലുപൂർ ഫ്ലൈഓവറിന് മുകളിലൂടെ 45 മീറ്റർ നീളമുള്ള ഭീമാകാരമായ ഒരു വയഡക്റ്റ് വിജയകരമായി സ്ഥാപിച്ചതാണ് പദ്ധതിയുടെ മറ്റൊരു സമീപകാല നേട്ടം. നിലവിലുള്ള റെയിൽവേ ലൈനിന് സമാന്തരമായി പോകുന്ന ഈ പാലത്തിന് 1,200 മെട്രിക് ടൺ ഭാരമുണ്ട്. അഹമ്മദാബാദ് ജില്ലയിലെ മാത്രം 31 പ്രധാന ക്രോസിംഗുകളിൽ 23 എണ്ണത്തിന്റെ പണിയും ഇതിനകം പൂർത്തിയായിക്കഴിഞ്ഞു. ജപ്പാന്റെ പ്രശസ്തമായ ‘ഷിൻകാൻസെൻ’ സാങ്കേതികവിദ്യയുടെയും സാമ്പത്തിക സഹായത്തോടെയുമാണ് നാഷണൽ ഹൈ സ്പീഡ് റെയിൽ കോർപ്പറേഷൻ ലിമിറ്റഡ് ഈ പദ്ധതി നടപ്പിലാക്കുന്നത്. പദ്ധതി തുകയുടെ 81 ശതമാനവും ജപ്പാൻ നൽകുന്നത് കേവലം 0.1% പലിശ നിരക്കിലുള്ള ദീർഘകാല സോഫ്റ്റ് ലോൺ വഴിയാണ്.
മഹാരാഷ്ട്ര, ഗുജറാത്ത്, ദാദ്ര-നാഗർ ഹവേലി, ദാമൻ-ദിയു എന്നിവടങ്ങളിലൂടെ കടന്നുപോകുന്ന ഈ റൂട്ടിൽ മുംബൈ, സൂററ്റ്, വഡോദര, അഹമ്മദാബാദ് ഉൾപ്പെടെ 12 സ്റ്റേഷനുകളാണ് ഉണ്ടായിരിക്കുക. മണിക്കൂറിൽ 320 കിലോമീറ്റർ വേഗതയിൽ സഞ്ചരിക്കുന്ന ബുള്ളറ്റ് ട്രെയിൻ യാഥാർത്ഥ്യമാകുന്നതോടെ, നിലവിൽ സാധാരണ ട്രെയിനുകളിൽ ഏഴ് മണിക്കൂറും വന്ദേഭാരതിൽ അഞ്ചര മണിക്കൂറും എടുക്കുന്ന യാത്രാസമയം വെറും രണ്ട് മണിക്കൂറായി ചുരുങ്ങും. രാജ്യത്തിന്റെ സാമ്പത്തിക തലസ്ഥാനമായ മുംബൈയെയും ഗുജറാത്തിലെ പ്രധാന വ്യാവസായിക നഗരങ്ങളെയും ബന്ധിപ്പിക്കുന്ന ഈ റൂട്ട് ഇന്ത്യയിലെ ഏറ്റവും തിരക്കേറിയ ബിസിനസ് ഇടനാഴിയാണ്. സർക്കാരിന്റെ ‘മേയ്ക്ക് ഇൻ ഇന്ത്യ’ പദ്ധതിയുടെ ഭാഗമായി സാങ്കേതികവിദ്യ കൈമാറ്റം ചെയ്യുന്നതിനും ഈ പ്രോജക്റ്റ് വലിയ രീതിയിൽ സഹായകരമാകും.