നോയിഡയിലെ ഫാക്ടറി തൊഴിലാളികൾ നടത്തുന്ന സമരത്തിന് സിഐടിയു പൂർണ്ണ പിന്തുണ നൽകുമെന്ന് ജനറൽ സെക്രട്ടറി എളമരം കരീം അറിയിച്ചു. പതിനായിരക്കണക്കിന് തൊഴിലാളികളാണ് കടുത്ത കഷ്ടപ്പാടുകൾ മൂലം തെരുവിലിറങ്ങിയിരിക്കുന്നത്. എന്നാൽ, ന്യായമായ അവകാശങ്ങൾക്കായി പോരാടുന്ന തൊഴിലാളികളെ തീവ്രവാദികൾ എന്ന് വിളിച്ച് ആക്ഷേപിക്കാനും സർക്കാർ സംവിധാനങ്ങൾ ഉപയോഗിച്ച് സമരത്തെ അടിച്ചമർത്താനുമാണ് ബിജെപി സർക്കാർ ശ്രമിക്കുന്നതെന്ന് അദ്ദേഹം കുറ്റപ്പെടുത്തി.
പുതിയ ലേബർ കോഡ് നിലവിൽ വന്നതോടെ മിനിമം വേതനം എന്ന സങ്കൽപ്പം തന്നെ കേന്ദ്ര സർക്കാർ ഇല്ലാതാക്കിയിരിക്കുകയാണ്. എട്ട് മണിക്കൂറിലധികം കഠിനാധ്വാനം ചെയ്യുന്ന തൊഴിലാളികൾക്ക് പ്രതിദിനം 300 രൂപയിൽ താഴെ മാത്രമാണ് വേതനം ലഭിക്കുന്നത്. തൊഴിലാളികൾക്ക് മാസം 23,000 രൂപ മിനിമം വേതനം നൽകണമെന്ന നിർദ്ദേശം സർക്കാർ അംഗീകരിക്കാൻ തയ്യാറാകുന്നില്ല. നോയിഡയ്ക്ക് പുറമെ ഹരിയാനയിലും തെലങ്കാനയിലും തൊഴിലാളികൾ സമാനമായ രീതിയിൽ സമരത്തിലാണെന്നും അദ്ദേഹം ചൂണ്ടിക്കാട്ടി.
അന്താരാഷ്ട്ര സാഹചര്യങ്ങളും രാജ്യത്തെ വിലക്കയറ്റവും തൊഴിലാളികളുടെ ജീവിതം കൂടുതൽ ദുസ്സഹമാക്കുകയാണെന്ന് എളമരം കരീം പറഞ്ഞു. ഇസ്രയേൽ-അമേരിക്ക സഖ്യം ഇറാനെതിരെ നടത്തുന്ന നീക്കങ്ങൾ രാജ്യത്ത് ഭക്ഷണസാധനങ്ങളുടെ വില വർധിപ്പിക്കാൻ കാരണമാകുന്നു. ജീവിതച്ചെലവ് കുത്തനെ ഉയരുമ്പോഴും തൊഴിലാളികളുടെ വേതനം വർധിപ്പിക്കാൻ അധികൃതർ തയ്യാറാകുന്നില്ല. ഈ സാഹചര്യത്തിൽ അവകാശങ്ങൾ നേടിയെടുക്കുന്നത് വരെ സമരം ചെയ്യുന്ന തൊഴിലാളികൾക്കൊപ്പം സിഐടിയു അടിയുറച്ചു നിൽക്കുമെന്നും അദ്ദേഹം വ്യക്തമാക്കി.