ടൊവിനോ തോമസിനെ നായകനാക്കി ഡിജോ ജോസ് ആന്റണി സംവിധാനം ചെയ്യുന്ന ‘പള്ളിച്ചട്ടമ്പി’ എന്ന ചിത്രത്തിനായി വലിയ ആവേശത്തോടെയാണ് സിനിമാലോകം കാത്തിരിക്കുന്നത്. കയാദു ലോഹർ നായികയായെത്തുന്ന ഈ ബിഗ് ബജറ്റ് ചിത്രത്തിലെ ‘കാട്ടുചെമ്പകം’ എന്ന ഗാനം കഴിഞ്ഞ ദിവസമാണ് പുറത്തിറങ്ങിയത്. ബോളിവുഡിലെ പ്രശസ്ത ഗായകൻ വിശാൽ മിശ്ര ആദ്യമായി മലയാളത്തിൽ ആലപിച്ച ഈ ഗാനത്തിന് ജേക്സ് ബിജോയ് ആണ് സംഗീതം നൽകിയിരിക്കുന്നത്.
ഗാനം പുറത്തുവന്നതോടെ സോഷ്യൽ മീഡിയയിൽ പ്രധാന ചർച്ചയാകുന്നത് ചിത്രത്തിലെ ടൊവിനോയുടെ ലുക്കിനെക്കുറിച്ചാണ്. പഴയകാല മമ്മൂട്ടി കഥാപാത്രങ്ങളായ സംഘത്തിലെ കുട്ടപ്പായി, ഒരു മറവത്തൂർ കനവിലെ ചാണ്ടിക്കുഞ്ഞ് എന്നിവരെ ഓർമ്മിപ്പിക്കുന്ന രീതിയിലാണ് ടൊവിനോ ഗാനരംഗങ്ങളിൽ പ്രത്യക്ഷപ്പെടുന്നത്. ടൊവിനോയുടെ ഈ വേറിട്ട ലുക്ക് ഇതിനോടകം തന്നെ ആരാധകർ ഏറ്റെടുത്തുകഴിഞ്ഞു. ഒരു പീരീഡ് ഡ്രാമയായി ഒരുങ്ങുന്ന ചിത്രത്തിന്റെ ഛായാഗ്രഹണം ടിജോ ടോമിയാണ് നിർവഹിക്കുന്നത്.
ഹിറ്റ് തിരക്കഥാകൃത്ത് എസ്. സുരേഷ് ബാബു രചന നിർവഹിച്ച ഈ ചിത്രത്തിൽ നിരവധി പ്രമുഖ താരങ്ങൾ അണിനിരക്കുന്നുണ്ട്. വേൾഡ് വൈഡ് ഫിലിംസിന്റെയും സി ക്യൂബ് ബ്രോസ് എന്റർടൈന്മെന്റിന്റെയും ബാനറിലാണ് ചിത്രം നിർമ്മിച്ചിരിക്കുന്നത്. അഞ്ച് ഭാഷകളിലായി ഒരുങ്ങുന്ന ‘പള്ളിച്ചട്ടമ്പി’ ഏപ്രിൽ 9-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യാനാണ് അണിയറപ്രവർത്തകർ ലക്ഷ്യമിടുന്നത്.