കോഴിക്കോട് ജില്ലാ പഞ്ചായത്ത് അധ്യക്ഷപദവി മുസ്ലിംലീഗും കോൺഗ്രസും രണ്ടര വർഷം വീതം പങ്കിടാൻ യുഡിഎഫ് ധാരണയായി. തിങ്കളാഴ്ച ഡോ. എം.കെ. മുനീറിൻ്റെ വസതിയിൽ ചേർന്ന യുഡിഎഫ് നേതാക്കളുടെ യോഗത്തിലാണ് ഇതുസംബന്ധിച്ച തീരുമാനം ഉണ്ടായത്. വൈസ് പ്രസിഡൻ്റ് പദവി മുസ്ലിംലീഗിനായിരിക്കും. ആദ്യ രണ്ടരവർഷം അധ്യക്ഷസ്ഥാനം കോൺഗ്രസിനായിരിക്കും. കോടഞ്ചേരി ഡിവിഷനിൽ നിന്നുള്ള മില്ലി മോഹനൻ, പയ്യോളി ഡിവിഷനിൽ നിന്നുള്ള പി.ടി. ഷീബ എന്നിവരെയാണ് ഈ സ്ഥാനത്തേക്ക് പ്രധാനമായും പരിഗണിക്കുന്നത്. ഇക്കാര്യത്തിൽ ബുധനാഴ്ച അന്തിമ പ്രഖ്യാപനമുണ്ടാകും.
വൈസ് പ്രസിഡൻ്റ് സ്ഥാനത്തേക്ക് മുസ്ലിംലീഗ് ജില്ലാസെക്രട്ടറിയും നാദാപുരം ഡിവിഷൻ അംഗവുമായ കെ.കെ. നവാസ്, താമരശ്ശേരി ഡിവിഷൻ അംഗവും തിരുവമ്പാടി മണ്ഡലം മുസ്ലിംലീഗ് ജനറൽ സെക്രട്ടറിയുമായ പി.ജി. മുഹമ്മദ് എന്നിവരെയാണ് പരിഗണിക്കുന്നത്. ഇതിൽ ജില്ലാസെക്രട്ടറി എന്ന നിലയിൽ കെ.കെ. നവാസിനാണ് കൂടുതൽ പരിഗണന നൽകുന്നത്.
ഇതിനുപുറമെ, കോർപ്പറേഷൻ മേയർ, ഡെപ്യൂട്ടി മേയർ പദവികളിലേക്കുള്ള തിരഞ്ഞെടുപ്പിൽ മത്സരിക്കാനും യോഗത്തിൽ തീരുമാനമായി. മേയർ സ്ഥാനാർഥി കോൺഗ്രസിൽ നിന്നും ഡെപ്യൂട്ടി മേയർ സ്ഥാനാർഥി മുസ്ലിംലീഗിൽ നിന്നും ആയിരിക്കും. നിലവിലെ കോൺഗ്രസ് കൗൺസിൽ പാർട്ടി ലീഡറായ കെ.സി. ശോഭിതയെ മേയർ സ്ഥാനത്തേക്ക് പരിഗണിച്ചേക്കാം. എങ്കിലും, മേയർ പദവി ജനറൽ ആയതിനാൽ പുരുഷ കൗൺസിലർമാർക്കും സാധ്യതയുണ്ട്. ഡെപ്യൂട്ടി മേയർ സ്ഥാനാർഥിയായി നിലവിൽ കൗൺസിലർമാരായ മുസ്ലിംലീഗ് അംഗങ്ങൾക്കായിരിക്കും മുൻഗണന. ഈ വിഷയങ്ങളിൽ രണ്ടുദിവസത്തിനകം തീരുമാനമുണ്ടാകും.