തിരഞ്ഞെടുപ്പ് സ്ഥാനാർത്ഥി പ്രഖ്യാപനത്തിന് പിന്നാലെ ആവേശകരമായ പ്രചാരണ പ്രവർത്തനങ്ങൾക്കായി മുഖ്യമന്ത്രി പിണറായി വിജയൻ കണ്ണൂരിലെത്തി. കണ്ണൂർ വിമാനത്താവളത്തിൽ ഇറങ്ങിയ അദ്ദേഹത്തെ സിപിഐഎം ജില്ലാ സെക്രട്ടറി കെ.കെ. രാഗേഷ്, സി.എൻ. ചന്ദ്രൻ, എം. സുരേന്ദ്രൻ തുടങ്ങിയ പ്രമുഖ നേതാക്കൾ ചേർന്ന് സ്വീകരിച്ചു. സ്വന്തം മണ്ഡലമായ ധർമ്മടത്താണ് മുഖ്യമന്ത്രിയുടെ ആദ്യ പ്രചാരണ പരിപാടികൾ നടക്കുന്നത്. വിമാനത്താവളത്തിൽ നിന്നും പിണറായിയിലേക്ക് കിലോമീറ്ററുകൾ നീളുന്ന ബൃഹത്തായ റോഡ് ഷോയോടെയാണ് അദ്ദേഹത്തെ അണികൾ വരവേൽക്കുന്നത്.
കണ്ണൂരിലെ പാർട്ടി കോട്ടകളിൽ വിമത ഭീഷണി ഉയരുന്ന പശ്ചാത്തലത്തിലാണ് മുഖ്യമന്ത്രിയുടെ ഈ സന്ദർശനം എന്നത് ഏറെ രാഷ്ട്രീയ പ്രാധാന്യമർഹിക്കുന്നു. തളിപ്പറമ്പിലും പയ്യന്നൂരിലും ഉൾപ്പെടെ മുതിർന്ന നേതാക്കൾ പാർട്ടി തീരുമാനത്തിനെതിരെ പരസ്യമായി രംഗത്തുവന്ന സാഹചര്യത്തിൽ, ഇടത് മുന്നണി നായകന്റെ സാന്നിധ്യം പ്രവർത്തകർക്ക് പുതിയ ഊർജ്ജം പകരുമെന്നാണ് സിപിഐഎം പ്രതീക്ഷിക്കുന്നത്. ജില്ലയിലെ വിഭാഗീയതയെക്കുറിച്ചും നിലവിലെ രാഷ്ട്രീയ വിവാദങ്ങളെക്കുറിച്ചും മുഖ്യമന്ത്രി പൊതുവേദിയിൽ പ്രതികരിക്കുമോ എന്ന ആകാംക്ഷയിലാണ് രാഷ്ട്രീയ കേന്ദ്രങ്ങൾ.
പിണറായിയിൽ നടക്കുന്ന ആദ്യ പൊതുയോഗത്തോടെ മുഖ്യമന്ത്രി ഔദ്യോഗികമായി പ്രചാരണത്തിന് തുടക്കം കുറിക്കും. ഇതിനു പിന്നാലെ അടുത്ത ദിവസം മുതൽ അഞ്ച് മണ്ഡലങ്ങളിലെ എൽഡിഎഫ് കൺവെൻഷനുകൾക്കും തുടക്കമാകും. പാലക്കാട്, കൊണ്ടോട്ടി, കൊടുവള്ളി, കോട്ടക്കൽ, തിരൂർ എന്നീ അഞ്ച് മണ്ഡലങ്ങളിലെ ഇടത് സ്വതന്ത്ര സ്ഥാനാർത്ഥികളെ വരും ദിവസങ്ങളിൽ പ്രഖ്യാപിക്കാനിരിക്കെ, മുഖ്യമന്ത്രിയുടെ ഈ സന്ദർശനം വരാനിരിക്കുന്ന തിരഞ്ഞെടുപ്പ് പോരാട്ടത്തിന്റെ ഗതി നിർണ്ണയിക്കുന്ന ഒന്നായി മാറും.