തന്റെ കരിയറിലും ജീവിതത്തിലും പിതാവ് മമ്മൂട്ടി നൽകിയ ഏറ്റവും വിലപ്പെട്ട ഉപദേശത്തെക്കുറിച്ച് തുറന്നുപറഞ്ഞ് നടൻ ദുൽഖർ സൽമാൻ. പുതിയ ചിത്രമായ ‘ഐ ആം ഗെയിം’ റിലീസിനോടനുബന്ധിച്ച് നടന്ന പ്രമോഷൻ പരിപാടിയിൽ, ആരാധകരിൽ ഒരാളുടെ ചോദ്യത്തിന് മറുപടി നൽകുകയായിരുന്നു അദ്ദേഹം. തന്നെ സ്വന്തം പാത കണ്ടെത്താൻ അനുവദിച്ചതിലൂടെ മമ്മൂട്ടി തനിക്ക് നൽകിയ സ്വാതന്ത്ര്യത്തെക്കുറിച്ചാണ് ദുൽഖർ സംസാരിച്ചത്.
താൻ ഏറ്റവും അനുഗ്രഹിക്കപ്പെട്ട മകനാണെന്നാണ് ദുൽഖർ വിശേഷിപ്പിച്ചത്. കാരണം, മമ്മൂട്ടി തന്റെ കരിയറിലോ ജീവിതത്തിലോ അനാവശ്യമായി ഇടപെടാറില്ല. “നീ തന്നെ ചെയ്യണം, നീ തന്നെ കാര്യങ്ങൾ കണ്ടെത്തണം, നീ പരാജയപ്പെടണം, നീ വിജയിക്കണം, അതെല്ലാം നിന്റേത് മാത്രമായിരിക്കണം” എന്നാണ് അദ്ദേഹം പറയാറുള്ളത്. എന്തെങ്കിലും സംഭവിച്ചാൽ പിന്തുണയുമായി താനുണ്ടായിരിക്കുമെന്നും, സർക്കസിൽ വീഴുമ്പോൾ താഴെ വിരിക്കുന്ന സുരക്ഷാ വല (സേഫ്റ്റി നെറ്റ്) പോലെയാണ് തന്റെ പിതാവെന്നും ദുൽഖർ വൈകാരികമായി പറഞ്ഞു. എന്ത് ചെയ്യണമെന്ന് കൃത്യമായി പറഞ്ഞുതരുന്നതിന് പകരം, സ്വന്തം തെറ്റുകളിൽ നിന്ന് പഠിക്കാനും വളരാനും അവസരം നൽകിയതാണ് തനിക്ക് ലഭിച്ച ഏറ്റവും വലിയ അനുഗ്രഹമെന്നും താരം കൂട്ടിച്ചേർത്തു. താരത്തിന്റെ ഈ വാക്കുകൾ ഇതിനോടകം തന്നെ സമൂഹമാധ്യമങ്ങളിൽ വൈറലായിക്കഴിഞ്ഞു. കൂടാതെ, 14 വർഷമായി സിനിമാരംഗത്തുണ്ടെങ്കിലും ദുൽഖറും മമ്മൂട്ടിയും ഇതുവരെ ഒരുമിച്ച് അഭിനയിച്ചിട്ടില്ല എന്നതിനാൽ, ഇരുവരേയും ഒരുമിച്ച് വലിയ സ്ക്രീനിൽ കാണാനുള്ള കാത്തിരിപ്പിലാണ് ആരാധകർ.
ദുൽഖർ സൽമാന്റെ കരിയറിലെ ഏറ്റവും വലിയ ചിത്രങ്ങളിലൊന്നായി ഒരുങ്ങുന്ന ‘ഐ ആം ഗെയിം’ ഒരു ബിഗ് ബഡ്ജറ്റ് ഫാന്റസി ത്രില്ലറാണ്. വേഫെറർ ഫിലിംസിന്റെ ബാനറിൽ ദുൽഖറും ജോം വർഗീസും ചേർന്നാണ് ചിത്രം നിർമ്മിക്കുന്നത്. സജീർ ബാബ, ഇസ്മായിൽ അബൂബക്കർ, ബിലാൽ മൊയ്ദു എന്നിവർ ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. സജീർ ബാബ, ആദർശ് സുകുമാരൻ, ഷബാസ് റഷീദ് എന്നിവരാണ് സംഭാഷണങ്ങൾ രചിച്ചിരിക്കുന്നത്.
മലയാളം, തമിഴ്, തെലുങ്ക്, ഹിന്ദി, കന്നഡ എന്നീ ഭാഷകളിലായി പാൻ ഇന്ത്യൻ റിലീസായാണ് ചിത്രം സെപ്റ്റംബർ മൂന്നിന് തിയേറ്ററുകളിൽ എത്തുന്നത്. ദുൽഖറിന്റെ 40-ാമത്തെ ചിത്രം കൂടിയാണിത്. ചിത്രത്തിന്റെ ട്രെയിലറിന് മികച്ച പ്രതികരണമാണ് ലഭിച്ചത്. തിയേറ്ററുകളിൽ തികച്ചും ത്രസിപ്പിക്കുന്ന ദൃശ്യാനുഭവമായിരിക്കും ചിത്രം സമ്മാനിക്കുക എന്ന സൂചനയാണ് ട്രെയിലർ നൽകുന്നത്. ആന്റണി വർഗീസ്, മിഷ്കിൻ, കായദു ലോഹർ, കതിർ, പാർത്ഥ് തിവാരി, സംയുക്ത വിശ്വനാഥൻ തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.