മൈക്രോസോഫ്റ്റ് ഫൗണ്ട്രി ഉപയോഗിച്ച് നിർമ്മിച്ച AI-അധിഷ്ഠിത നാച്ചുറൽ ലാംഗ്വേജ് സെർച്ച് ഫീച്ചർ ആരംഭിക്കുന്നതായി ഫോൺപേ ഇന്ന് പ്രഖ്യാപിച്ചു. സാധാരണ സംസാരിക്കുന്ന ഭാഷയിലുള്ള ടെക്സ്റ്റ് അല്ലെങ്കിൽ വോയ്സ് കമാൻഡുകളിലൂടെ ആപ്പിലെ കാര്യങ്ങൾ എളുപ്പത്തിൽ ചെയ്യാനും പൂർത്തിയാക്കാനും ഈ ഫീച്ചർ ഫോൺപേ ഉപയോക്താക്കളെ സഹായിക്കുന്നു. ഇത് ഉപയോക്താക്കൾക്ക് കൂടുതൽ സൗകര്യപ്രദവും മികച്ച വ്യക്തിഗത അനുഭവവും നൽകുന്നു.
മൈക്രോസോഫ്റ്റ് ഫൗണ്ട്രിയുടെ സവിശേഷതകൾ ഉപയോഗിക്കുന്ന ഈ ഫീച്ചർ, പരമ്പരാഗത നാവിഗേഷന് പകരം ഉപയോക്താക്കൾ ഉദ്ദേശിക്കുന്നത് മനസ്സിലാക്കി അവരെ ലക്ഷ്യസ്ഥാനത്തേക്ക് നേരിട്ട് നയിക്കുന്നു. ഉദാഹരണത്തിന്, “ഹേമന്തിന് 20 രൂപ നൽകുക” എന്ന നിർദ്ദേശം നൽകിയാൽ, ഹേമന്ത് എന്ന വ്യക്തിയെ മുൻകൂട്ടി തിരഞ്ഞെടുത്ത് പേയ്മെൻ്റ് ഇൻ്റർഫേസ് ഓട്ടോമാറ്റിക്കായി തുറക്കുകയോ അല്ലെങ്കിൽ ഹേമന്ത് എന്ന് പേരുള്ള എല്ലാ കോൺടാക്റ്റുകളും കാണിക്കുകയോ ചെയ്യുന്നു. അതുപോലെ, “FASTag റീചാർജ് ചെയ്യുക” അല്ലെങ്കിൽ “സ്വർണ്ണവില” തുടങ്ങിയ കമാൻഡുകൾ ഉപയോക്താവിനെ അനുയോജ്യമായ പേജിലേക്കോ, അല്ലെങ്കിൽ ഏറ്റവും കൃത്യമായ വിവരങ്ങളും ട്രാൻസാക്ഷൻ ഓപ്ഷനുകളും നൽകുന്ന ഭാഗത്തേക്കോ കൊണ്ടുപോകുന്നു.
സാധാരണ ട്രാൻസാക്ഷനുകൾക്ക് അപ്പുറം, ഉപയോക്താവ് ഒരു പേയ്മെൻ്റ് നടത്താനാണോ, പർച്ചേസ് ചെയ്യാനാണോ, അതോ സഹായത്തിനായി സപ്പോർട്ട് ടീമിനെ ബന്ധപ്പെടാനാണോ ശ്രമിക്കുന്നതെന്ന് മനസ്സിലാക്കാൻ ഈ ഫീച്ചറിന് കഴിയും. ലോക്കൽ ഓൺ-ഡിവൈസ്, ക്ലൗഡ് ഇൻഫറൻസിംഗ് എന്നിവ സംയോജിപ്പിക്കുന്ന ഒരു ഹൈബ്രിഡ് മോഡൽ വഴിയാണ് ഇതെല്ലാം സാധ്യമാക്കുന്നത്. ഉപയോക്താക്കളുടെ വ്യക്തിഗത വിവരങ്ങളോ ട്രാൻസാക്ഷൻ ഡാറ്റയോ ഫോൺപേ ഇക്കോസിസ്റ്റത്തിന് പുറത്തുപോകുന്നില്ലെന്ന് ഉറപ്പുവരുത്തി, പൂർണ്ണമായ സുരക്ഷയോടെയും സ്വകാര്യതയോടെയുമാണ് ഇത് പ്രവർത്തിക്കുന്നത്.